《我的港女老婆》源於真愛　作者Cuson漫畫寫夫妻相處細節最共鳴

港女一字本身只代表香港女性，但近年呢個詞基本上係負面居多。根據網上解說「港女是過份自我中心、拜金主義者，有公主病的香港女性。」，不過漫畫家盧熾剛（Cuson）筆下嘅《我的港女老婆》系列卻大受歡迎，一切刁蠻任性舉動都變得可愛，一切都源自於佢對另一半Caca嘅愛。

【我的港女老婆】作者疑戴綠帽網民神速起底　女主角Caca急刪Page

睇番《我的港女老婆》作者寫嘅書序：「本書內容主要以我老婆為中心骨幹，唔好誤以為呢本係以冧爆老婆為目的嘅讀物，相反，本書係我對老婆作出嘅種種控訴，揭露佢不可理喻嘅惡行，藉此宣泄我日常受到嘅各種鬱結……嗚嗚……」看似係控訴，其實真係感情唔好又點會咁多互動分享呢。

曾經做過廣告設計嘅Cuson，2009年開始畫政治漫畫，2011年轉做自由插畫師，佢同另一半Caca結婚近10年，單係《我的港女老婆》Facebook專頁已經有超過13萬6千粉絲。之前一齊接受訪問時Cuson曾透露，其實漫畫出版前曾詢問太太意見，點知太太唔單止一口應承，仲要求畫得佢靚啲可愛啲，而「港女老婆」呢個稱號，畢竟係比較負面，但出版社建議下，加上可以俾丈夫Cuson完成出書夢，所以被稱為「港女」也不會介意。

Cuson年少時已喜歡畫漫畫，小時候最愛看老夫子、IQ博士、叮噹等，但早已明白，長大後以畫漫畫為生難以餬口，故他早已放棄當漫畫家的夢想，估唔到因為網上嘅輕鬆分享，意外成就出書夢。Cuson自認創作力不高，九成以上的漫畫內容，靈感泉源來自太太。Cuson說每每發現Ca Ca有「搞笑之作」時，會立即記下，又曾經為了找新題材，二人一起出外旅行，無形中增加二人相處機會，一切都係源於愛。