林峯加盟古天樂旗下　《尋秦記》主要角色集齊開續集不是夢？

神劇《尋秦記》網友一向力捧，又十分希望開拍續集，可惜各位主要演員一係退隱，一係經理人公司各有所屬，要一班人再聚合似乎有難度。

不過最近機會終於出現啦，近年在電影圈大展拳腳，又不斷簽入藝人的古天樂，除之前簽入宣萱後，最新買入對象就係剛跟英皇滿約的林峯。而碰巧林峯今日出席記者會時，古天樂經理人Ronnie全程照顧，答案似乎呼之欲出，林峯就話：「我係同宣萱一樣，簽咗古天樂個經理人，因為我入TVB時，佢係第一個睇我嘅經理人，咁多年都一直有保持聯絡，至於個人工作室，就唔會搞住啦。」有宣萱又有林峯，再加多個古天樂，陳鍵鋒又長期在內地拍劇，睇怕古仔一吹雞都隨時ready，另一主要女角雪兒又同古仔關係良好，《尋秦記》角色都幾乎集齊，獨欠嫪毐江華呢個不明因素，計計下，睇嚟開《尋秦記》續集都不是夢。

此外，近年主力內地市場的林峯，今年終於喺香港有作品推出，參與由英皇、優酷合作的網劇《PTU機動部隊》，劇中飾演警察臥底的他，今日以警察look現身記者會，非常有型。訪問時，林峯表示雖然係拍劇，但每日開工都似拍戲，並指因為要用廣東話對白，所以不時食螺絲。林峯過往在不少劇集也曾飾演警員，但一直未有機會著上制服，問他對於自己的PTU造型有什麼評價，他笑言「確係有啲型」，又指自己小時候也幻想過做警察。