張華標北上發展好自由　暫無心返港：一線編劇10幾萬人民幣一集

前TVB編劇張華標寫下多個經典劇集，首屈一指的就是《溏心風暴》兩部曲。自他完成了《巾幗梟雄之義海豪情》後，就離開TVB往內地發展，如今第8個年頭，華標叔自稱是「充其量是二線小編劇而已」，非常謙虛。而他目前很享受在內地當編劇，因為可以當個「自由人」，沒有回到TVB坐鎮的意思。

華標叔2010年後毅然離開，他解釋想有更多新嘗試，而他在內地主要編寫古裝劇及時代劇，其中一套為《大當家》。提到在內地做編劇，收入比在TVB工作為高：「喺TVB除非係外判，如果唔係嘅話，都係月薪制。喺大陸就唔同，就按集數計囉。」至於兩地薪金的差異，華標叔就沒有直接回應，只透露其他例子：「如果喺內地一線編劇，佢哋就10幾萬人民幣一集（咁你呢？）我就…唔講喇，只不過係二線編劇仔啫。」作為一個資深編劇，華標叔這說真是謙虛，正因為他在TVB打響名堂，如今60多歲的他，也沒有甚麼終極目標：「唔諗咩頂唔頂尖喇，我只覺得自己而家好自由自在，我好享受呢個工作模式。」

「有時候寫寫下劇本，都會好掛住用廣東話寫劇本，因為有啲嘢用自己講開嘅語言先至到位，不過內地團隊都有幫我嘅。」雖然對出生地有情意結，可是華標沒有打算回到香港發展，因為兩地節奏有著明顯差異：「以前喺TVB一年可能要寫一套半劇集，一套40集加一套20集嘅劇，好多嘢都係好趕好密；但係內地可以畀足時間，兩年先至出一套劇，有晒時間做資料搜集，自由度都好大，不論框架定係準備時間。」

除此之外，華標叔自言「唔會返TVB阻住晒」，皆因近年來已有新一批優秀的電視人彈出：「我有留意近幾年嘅劇㗎，就好似《降魔的》、《城寨英雄》咁，佢哋嘅劇本都好出色，後者好有漫畫色彩。我都幾睇方駿釗、葉天成佢哋未來5至10年，將會成為好出色嘅編劇，佢哋諗嘅嘢講真我呢個年紀真係諗唔到㗎，我無謂返去阻住佢哋喇。」華標叔的答案，果然有前輩風範。