【有病有真相】地獄級M痛程度表 葉巧琳：經期超過10日
撰文：洪曉璇
出版：更新：
今日清晨錄得入冬以嚟最低溫度，多個地區跌破6度低溫，無論大人定細路都凍到騰騰震，如果女士們仲要撞正經期更加係痛不欲生！平時成日講笑話嚟M嘅女人脾氣特別差，大家又有無去了解過女士們嘅痛呢？由陳啟泰主持嘅ViuTV節目《晚吹 - 有病有真相》呢日就以經痛為題，將經痛嚴重程度分為7級，男士們要學嘢啦。
腰痛、肚瀉、甚至嘔吐大作，好多女士每個月經期時都要面對呢啲不適，周而復始，男士們無需要經歷自然難以明白有幾慘。ViuTV節目《晚吹 - 有病有真相》呢日就以經痛為題，請嚟歌手葉巧琳分享自己經痛有幾嚴重，除咗痛到落唔到床，唱歌發唔到力，仲試過痛到演出要失場，「經期比一般人長，超過10日。痛到我覺得自己身體有事要去check下，照超聲波發現原來有肌瘤。」節目中將經痛程度分為7級，方便男士幻想經痛究竟有幾辛苦。
LV1 完全不痛
LV2 腹部不適 無法冷靜下來
LV3 腹部有輕微痛楚
LV4 像肚瀉般痛
LV5 痛到不能發聲 嘔吐 肌肉似被打
LV6 痛到不能走動 視力變得模糊
LV7 像被鐵球連續擊中
生仔如果有十級痛，嚴重經痛其實可能仲慘，生仔都係一世人最多幾次，經痛係每個月都要面對。雖然男士無法代另一半承受，不過其實都仲有好多嘢可以做嘅，例如多啲斟暖水、預備暖水袋，經痛好多時會伴隨腰痛酸腰，提供腰墊或者幫忙按摩都可以紓緩不適，當然啦如果見到另一半痛得太嚴重，就要帶佢去睇醫生check真啲啦。