【公公出埠】黃浩然同蕭正楠合力串曹永廉　阿廉無癮黑面嬲豬

繼《Do姐再shopping》後接棒播出的無綫縱藝節目《公公出埠》已經播出了第一集，成個感覺就是充滿了兄弟情，如果鍾意睇一班老友去旅行的真人騷，但又嫌《胡說八道真情假期》太過嘈，Do姐的介紹又太過資訊性有些似跟稿讀，咁呢套公公就無以上的問題喇，而且因為主持的黎耀祥 (祥仔)、曹永廉 (阿廉)、蕭正楠 (Edwin) 同黃浩然私底下真係好好朋友，完全可以感受到同老友出遊那種爽歪歪的開心，他們此行的目的地就是泰國布吉。

網民同觀眾都大讚四個人表現得好真，就好似他們平日聚埋一齊傾偈咁，令人睇得好舒服。不過成集最吸睛的絕對是黃浩然在開場無耐就半裸上身爆肌噴水的一幕，呢個鏡頭好珍貴，只得一秒，要望實先睇到。42歲的他依然keep得勁fit，成排朱古力出晒來，係正嘅！而Edwin都有曬心口，見他的胸肌都脹卜卜有些睇頭，但就當然不夠黃浩然咁搶Fo啦。

今集都有不少笑位，他們四個交換禮物那part就最好笑，係咁互相叫契弟，黃浩然話：「呢條弟食水咁深，1000泰買張咁嘅嘢，大佬呀。」阿廉就話：「買隻介指黎畀我陪葬呀？諗嗰條友我希望佢今晚肚痾呀真係！」他自己送了件寫住「76」的T恤給祥仔，好抵死，當Edwin叫阿廉試戴他送的耳環，阿廉即串他說：﹝我買條底褲俾你，唔通你又試畀我睇呀？」不過原來在鏡頭背後，Edwin同黃浩然就因為夾埋串阿廉而搞到他嬲嬲豬，但老友嬲一陣就算啦，無隔夜仇嘅。