TVB劇連環爆粗好出奇　係寫實定教壞細路？

近兩年來，有收看過TVB電視劇的觀眾，偶爾都會提出疑問：「乜而家TVB劇可以講粗口㗎咩？」直至台慶檔期，這個話題愈講愈激烈。事關兩套劇《誇世代》與《降魔的》講粗俗說話的次數頻密了。8點半看電視見到歐陽Bobby講「頂你個肺」講得瑯瑯上口，還有Ben Sir出場講返典故…當然沒講完整版本喇，講埋實收投訴，講前都加返個PG家長指引先；其後9點半間中見到的士佬馬明爆幾句「仆X」，一個不夠，還有幾個的士佬加把口「仆X！仆X！」對於這個現象，不同人就有不同看法，有人話貼地，有人就話粗鄙。

記得有段時間，TVB劇集沒有出現過相對粗俗的對白，想講「仆X」？唯有講「衰人」作修飾，所以突然聽到演員爆一句，觀眾反應好似聽到靚女會去大便一樣，感到神奇。其後反應就是執著於劇集出現粗口有甚麼影響，討論之間最初都會將這些用語定性為「粗口」還是「粗俗用語」，不過就算粗口還是粗俗，都總會有人話「教壞細路！」TVB一定有考慮過這些反應，為甚麼還要依舊爆粗呢？

TVB會再解禁粗俗語言，並不是無理由。常常感嘆收視難見返3、4字頭，不夠年輕化或者是其中一個原因，加上TVB開始任用後起之秀、年輕編劇，他們都會認為不離地、寫實，可以吸回一些年輕觀眾，除了講時事議題，不挑戰底線下爆少少粗，可以挽回一點共鳴，讓人看得過癮。就好似《降魔的》，馬明他們飾演的士佬，為求貼地寫實，所以他們都會講粗口。雖然講來講去都是「頂！」、「仆X」，但至少你會感受到的士佬的粗豪，難道的士佬有「X街」不說，要鬧人「衰人」？聽起來總帶幾分矯柔造作。

姑勿論有沒有大作用，有種事與願違的感覺就是，現在看電視的受眾中，師奶依然最多。師奶聽到粗口，當然覺得刺耳、教壞細路，小朋友學習能力高，萬一學懂在學校對住老師講點算？此時就會有人標籤師奶為「道德人」，開始反駁：「你睇返《大時代》喇！夠有講X街！」話中之意譏諷師奶思想倒退、偽善。師奶又怎會理？剛巧之前大熱網劇《反黑》，講黑警講古惑仔，偏偏一句粗口都聽不見，原來監製之一宋本中解釋特意不爆粗，怕教壞小朋友，他自己小時會講粗口都是因為看到以前的古惑仔片。

生活上遇到不如意，爆幾句粗發洩屬人之常情，只要不傷害到人其實無傷大雅。可是TVB劇集爆粗，正反雙方總是會爭持不下。說實在，小朋友就算不看電視，總會有機會聽到粗口，也應該有權知道粗口，爆不爆粗是個人選擇。師奶們，雖然有「PG家長指引」未必最有效，但怕教壞細路、有樣學樣的話，不如趁機會當教學時間，讓小朋友知道粗口要看場合不能隨便亂講，既然小朋友吸收能力高，順便訓練一下自制能力，禮儀都係咁樣學返嚟。