與言承旭蜜會40小時傳婚訊　林志玲現身風騷曬V

言承旭被影到專誠飛去馬來西亞搵林志玲，仲要下塌同一酒店後，以28字回應傳媒：「很開心聯繫上了，是真誠的互相關心，看到了報道，希望大家給點空間。」而林志玲亦透過工作室回應：「謝謝大家的關心，希望能夠多留一點空間給藝人保留隱私，如果復合姐姐應該會選擇大方和大家分享喜悅。」當事人未有正面承認復合，不過台灣傳媒就搵到志玲媽媽講兩句：「以前他（言承旭）都常在我們家跑來跑去……如果他們覺得很好，那我當然OK」。好明顯連林媽媽都開晒綠燈樂見其成。

由於大批傳媒喺酒店大堂守候，都未見二人蹤影，推測佢地一直都留喺酒店內未有外出。直至12號林志玲終於現身，下晝4點左右離開酒店快步上車，趕到機場乘搭7點航班到重慶工作。身穿白色上身衫黑色裙嘅志玲，戴上太陽眼鏡一直保持微笑，全程未有回答記者提問。聽到「是否已經與言承旭復合」，佢仲佻皮聳肩，入閘前向傳媒曬V字同揮手道別，心情相當唔錯。其後亦有空姐上載照片，話喺往重慶航班上遇到林志玲，仲成功合照。