【萬聖節．多圖】官恩娜2歲囝扮吸血紳士勁萌 星B可愛造型大檢閱
10月31日萬聖節，又係一年一度攞正牌扮鬼扮馬嘅日子，唔少藝人會幫仔女悉心打扮，平時已經超得意嘅星B們可愛度爆晒燈﹗大家未諗好今年扮咩，不妨向佢地偷下師啦﹗
楊千嬅忙住為跨年演唱會綵排，早兩日抽時間陪囝囝Torres扮鬼扮馬，千嬅以神奇女俠造型現身，盡show近日訓練成果，老公丁子高就戴上金色假髮配戰士造型，不過都不及Torres全面加雙手搽到綠晒咁搶鏡﹗
懷孕6個多月嘅官恩娜，就著住黑色長tee，肚前有個大南瓜，至於已經2歲嘅囝囝BéBé G就扮成吸血小紳士，造型可愛多過驚嚇。佢話如囝囝去萬聖節派對，會收到很多糖，叮囑囝囝唔好食太多。
周汶錡兩個囝囝Jacques同Avner仲有鍾麗緹囡囡，都扮成小魔鬼同女巫，台灣藝人賈靜雯同修杰楷，就將兩個囡囡咘咘Bo妞畫成小貓咪，至於范瑋琪同黑人陳建州嘅孖仔，就比較特別，全身紅色扮消防員。
大小S孖住大班老友提早開Halloween Party，小S扮成甜美的白雪公主，直呼「為了孩子什麼都得做」， 不過就「發現自己真的很像白雪公主，但個性是巫婆喔」。至於3個囡囡分別扮安娜貝爾、《Coraline》卡羅琳以及小貓女，不過都不及表弟汪希箖搶鏡，因為大S之前講過唔想俾囝囝曝光，咁啱小S貼嘅其中一張合照，徐媽媽正正就抱住大S囝囝。
最有心思就不得不提台灣藝人關穎啦，今年佢幫囡囡CC打造4個造型，分4日PO上網同大家分享，第一個曝光的是美人魚造型， C.C.一手拎住棒棒糖，以美人魚的造型坐在泳池邊，關穎還寫道：「還記得去年的胖河豚 長大了~」，隔日古代格格的型，第三個日本藝伎look令網友驚歎「CC竟然願意戴藝伎的假髮」
最有爆點嘅壓軸造型，居然係Victoria Secret超模look！2歲嘅小妹妹著住白色Lace邊Bikini，仲有白色吊帶網襪，背脊揹住天使翅膀，簡直係天使與魔鬼嘅化身，網友不禁驚歎媽媽太有心思啦。