【反黑】宋本中感激兄弟齊孭鑊：投資者開拍前突然失蹤
《反黑》當初不被看好，如今為導演宋本中贏了風光一仗，連國際視頻網都要合作，係威嘅。
6,500萬的製作費，到底為宋本中帶來多少收益呢？「賺！大家都咁鍾意已經係賺爆啦。」說時笑得十分燦爛，並再一次表示感恩。劇中，B1-1組感情深厚有鑊齊齊孭，現實中，李璨琛、陳國坤等人原來為宋本中孭過更大的鑊，男人的浪漫，下世一定還……
早前訪問陳國坤時，已聽過他說由於找不到投資者，所以要以身作則，增加說服力，不過，原來故事仲有下文。「開拍前一個星期，投資者發生了一點事，完全失蹤，拍到第七日真係無晒錢，李璨琛、陳國坤、黃伊汶，陳文彪喺我嗌晒救命時，二話不說拎錢出嚟，真係感動到喊，亦都好多謝佢哋，尤其是李璨琛，佢同我講呢鋪唔衰得，話自己有幾百萬可以拎出嚟……」宋本中娓娓道出這背水一戰的故事，並拍拍心口表示「第二、三季好穩定架啦！不過真係心血少啲都唔掂。」之後更打趣說自己是演員出身，令他有足夠的演技瞞騙其他人。先不要說賺，能夠回本其實已經好好，結局後迅速下架雖然有爭議，但大台劇都有時限啦。
《反黑》其實有着不少的意外，先是資金，後是檔期，原先10月底推出，但因為《爸爸去哪兒》令陳小春十分火熱，內地的播放平台優酷提議早點見街，一班幕後工作人員chur盡配合。所以儘管有不少低級錯誤位，也無得好鬧，如今YouTube全面下架，好讓他們慢慢細執。「要講今次最遺憾嘅，係因為成日都要為資金東奔西跑，所以無花太多時間去雕琢啲鏡頭。」
對於有傳《反黑》因有大陸資金，故拍攝時受到不少政治壓力，宋本中澄清所有投資者都是香港公司。「自己又唔係知識份子，書又唔係讀得多，所以完全唔存在用劇去講啲咩歷史。」他又指出全劇唔煙唔粗口，並不是為了要通過內地的審批，而是作為一個媒體工作者應有的責任。「小朋友三歲都可以上網，同埋我自己細個都係睇太多廣告所以學食煙，到而家都戒唔到，我係咪仲要去害下一代呢？食煙喺《反黑》係咪咁重要呢？唔係囉。陳小春都曾經講過無諗《古惑仔》咁大影響，某程度上亦教壞咗一班人，以為做古惑仔好威，搵到錢，其實唔係。」觀眾有留意的話，每個角色離去之後都有一段自白，除了更詳細交代背景之外，眾人都會苦口婆心叫大家唔好學壞，教育意義何其重。宋本中一直以電視劇的標準去拍攝《反黑》，目的是希望有日可以喺電視播出。「所有嘢都係我決定，無嘢可能左右我，我真非常咁『盟塞』。」
第二季已在籌備當中，資金充裕，除了劇集之外，亦會有電影版本「電影會係網劇的大結局，兼所有動作的部分」。儘管今次碌盡人情卡，但宋本中都唔希望予人搵笨感覺。「我同小龍（陳國坤）都覺得搵得朋友，人哋出100，我哋要出夠150，有錢點解唔齊齊搵？」雖然演員陣容未能公開，但宋本中就預告招積下場。「而家只係4.0，之後會有一個神棍期，再變成真招積。」張建聲憑招積一角上位，與他認識數十年的宋本中也替兄弟高興。「招積本身戲份唔多，開劇前張建聲陪我到處籌集資金，第一次斷資金時，佢陪我飲酒，個角色就係咁慢慢tune出嚟。」能夠與一班兩肋插刀的朋友共同完成《反黑》，感恩。