【任噏亂評】假如我老公是王浩信　最怕狼來了有次變成真

近日又再傳出王浩信 (Vincent) 與陳自瑤 (Yoyo) 婚變，無錯，是又再傳，兩人結婚至今六年屢傳婚姻亮起紅燈，最新的傳聞是指Vincent背住太太Yoyo，相約劇集女拍檔打邊爐撐枱腳，於vip房內獨處一室。另外又有指是因為男尊女卑，加上Yoyo不肯與Vincent生第二胎而令兩人鬧離婚，並已分了居。雖然Vincent今日出席活動時已對有關傳聞作出否認，公開表示和太太感情無問題，叫大家放心，不過他每次的例牌否認依然阻止不到外界對他和Yoyo這段婚姻的種種揣測，似乎已認定了兩人不再恩愛，大抵下次再傳兩人婚變也只是時間問題。

Vincent近年備受無綫力捧，已成為一線小生穩坐男一的地位，工作接個不停，加上本身高大靚仔，以他這樣的條件，有女埋身都好正常，就算一早封了盤，亦無損他的吸引力。而作為Vincent的太太Yoyo，有個這樣的老公又會是甚麼心情呢？如果我的老公是王浩信，我估我會日日有得震無得瞓。老公咁有女人緣，成日同TVB的花旦小花拍劇有感情線，攬攬錫錫這類親熱戲在所難免，甚至會有激情床上戲，話就話是拍劇做戲啫，但那些身體接觸都是真的，而且人非草木，咁樣朝夕相對，見女拍檔仲多過見老婆，娛樂圈咁多誘惑，做老婆又點會話唔驚吖？

最慘是老公經常同女拍檔傳緋聞，傳到好似真嘅一樣，正所謂空穴來風必有因，點解個個唔傳係要傳你兩個？作為老婆無錯是應該相信老公，但也不是盲目地完全信晒㗎嘛，重點是老公要是個值得信任的人先得。而Vincent在臨結婚前，老婆大住個肚都居然被雜誌踢爆他偷會𡃁模，仲要被老婆撞破他帶對方返屋企，如果他是我老公，我未必可以好似Yoyo咁大方肯原諒他。好喇，就算當我可以不計前嫌，既往不咎地原諒他，但他婚後依然一而再再而三地跟其他女拍檔傳出緋聞，咁點計先？講過大話呃我嘅人，叫我仲怎樣去相信他？狼來了小朋友都識啦。仲有要諗點去回應傳媒，隨時諗到心力交瘁，還要在人前撐他，EQ低些都唔得。

我覺得一個女人同另一半一齊最重要是有安全感，有人話安全感不應該是由對方給予，而應該是自己給自己的，例如要對自己有信心，Keep靚自己。但其實小三不一定要靚過正印，要不然就不會有戴安娜與彭美拉的事件，不是自己樣靚身材正，就保證到老公不變心的。所以如果我老公係Vincent咁，成日忙工作忙到無返屋企，幾日都見不到一次，身邊又有咁多女性團團轉，我真係會零安全感囉。外人睇可能會以為我有個咁正的老公好幸福，其實我真是有苦自己知，分分鐘連想同老公吃餐飯都要跟他度期，唔知排到幾時。