【同盟】歐瑞偉做武師試過５樓跳落街　諗返都驚：好似去行刑！

要數近年最搶鏡，入屋的配角，一定係55歲的歐瑞偉，尤其這個月，夜晚八點《開心速遞》先見到他演繹搞笑的KC，之後《同盟》又見到非常好打的易先生，人氣強過一線小生，但歐瑞偉看得淡然。武師出身的他，1985年入無綫訓練班，在這行32年，他說：「開心但唔會太興奮，喺呢行太耐喇，呢個月有人記得，下個月仲有少少，再下個月就冇人記得喇，演員做好自己本份應該嘅，後面有冇名利帶俾你？唔知，但做好自己先....」歐瑞偉不是說客套話，他的事業有高有低，做過電影主角，亦試過在電視台從頭做起，他明白自己的位置，有工作，繼續有劇拍才是最實在。

年輕時的歐瑞偉是武師，身手胆識拍得住易先生，他說：「嗰日收到電話，叫我跳，諗住兩樓啫，俾盡你咪三樓，點知去到５樓。嘩，嗰套係《飛虎奇兵》余允抗導演，我好驚，我同另一位師兄，數咗幾次一二三先跳，地下紙皮箱有一層樓咁高啦，砰一聲跳咗落嚟，成班人衝埋嚟問我哋有冇事？我凈係關心拍唔拍到啫，點知cam1話拍到，但第二部cam，攝影師話sorry，因為太快追唔切，咁點？咪我哋又行返上五樓再嚟過囉，真係好似行去刑場咁，你係聽到自己心跳㗎，跳第二次一樣驚，樓下啲紙皮箱其實「巢哂」，夾硬切好佢，但我唔可以唔跳㗎，如果唔跳我冇得再喺呢行立足，好彩第二次成功，最後賺咗六七千蚊......」

除了《飛虎奇兵》外，歐瑞偉最記得和錢嘉樂一齊拍洪金寶的《貓頭鷹與小飛象》，他說：「嗰次又係好驚，第一次冇嘉樂仔嘅，第二次就有，爬咗廿幾呎樓梯，一嘢跌落水桶，硬食，冇乜墊住，中間頭尾我受咗傷，大哥大（洪金寶）話唔得！中間好似假人咁，再嚟，佢想我哋中間過程，fing手fing腳，但唔得㗎，如果唔揸住條梯，成個跌落嚟會死，拍完第二次，大哥大再睇，又話唔得，好彩製片話，再拍會死人喎，大哥大先話哦！咁ok。諗返起好驚，所以香港動作片咁出名，其實有好多人默默耕耘出過力，比我更危險嘅都有，我只係慶幸自己掹車邊有出過少少綿力，都叫做其中一份子。」瑞偉哥,你唔只出力，係直頭出命喎........（下集繼續有瑞偉哥訪問，大家留意喇。）