【最美孕婦】胡杏兒挺7月個孕肚　赴廣州宣傳四肢好纖幼

傳統智慧話，大肚婆唔好出遠行，怕周車勞頓影響胎兒。不過今時今日通常有醫生証明下，孕婦都會照出門旅行。胡杏兒之前同胡說八道會幾個好姐妹，去澳洲旅行兼拍攝之後，8月20日去到廣州，出席佢有份參演嘅電視劇《那年花開月正圓》發佈會，懷孕七個嘅杏兒狀態非常好，身穿深色露肩長裙嘅佢，四肢依然纖幼，7個月大嘅孕肚亦遮得好好，被內地媒體形容為不走樣嘅時尚準媽媽。

杏兒表示，之前拍《那》劇差不多大半年，由秋天拍到冬天再回暖，經常要香港、無錫兩邊飛，但能與一班專業團隊合作，是件非常高興的事，她說：「我本身好欣賞孫儷，同佢合作係感受到佢係好專業嘅演員，佢當然戲份好重，一日拍十幾廿場戲，但好敬業，唔會NG，佢係好有準備、做足功課，同啲咁好嘅演員合作係好開心嘅。」劇組亦公開其官方海報，對比在懷孕前已拍攝嘅海報相片，大肚前後杏兒的確分別不大。

杏兒喺發佈會上介紹角色時表示：「我飾演胡家大小姐胡詠梅，係一個好單純嘅女仔，性情溫和，知書達理，喜歡琴棋書畫，應該算係嗰個時代嘅文青吧。」

對於今次能接拍呢套內地以女性為主題嘅劇組，杏兒話感到榮幸，因為導演丁黑係知名導演，而且劇本又精彩；其劇中角色「胡詠梅」係秦商大家閨秀，外表溫文爾雅，但因對感情太執着而影響命運，結果這位無憂無慮的富家千金，不止無緣嫁給飾演青梅竹馬「吳聘」的何潤東，更處處遭逢坎坷，與孫儷演變成情敵，關係對立。

針對劇中呢段青梅竹馬嘅感情線，杏兒就話：「胡詠梅同何潤東飾演嘅吳聘係青梅竹馬玩伴，亦係佢心目中嘅白馬王子。何潤東非常符合呢個角色定位，非常有型呀﹗」