原來毒都可以咁好玩 「香港毒撚音樂節」Alonekenfap
去年11月底，大型音樂節Clockenflap落幕，當人人趕著撰寫感性文章抒發看過New Order如何感動時，一個擺明惡搞的Facebook專頁Alonekenfap橫空出世，開宗明義大搞「香港毒撚音樂及電影節」。原本純屬自娛的網絡惡搞卻意外大受歡迎，主腦人索性豁出去搞一個真正音樂節，並召集所有「毒L」的面孔，今個周末在火炭見面……咪住先，到底整個音樂節是「咩葫蘆賣咩藥」？
矛頭直指Clockenflap？
Clockenflap近年越來越受歡迎，門票大賣，場面熱鬧，但也有批評指這是個以娛樂外國人為主的離地活動，Alonekenfap明目張膽地在翌日惡搞Clockenflap，難免令人有所聯想，但他們澄清：
「Clockenflap我哋去足5年，無理由串返自己嘅，我哋針對嘅唔係大會，而係生態。」
Alonekenfap其中一位搞手邱生形容，Clockenflap為「攬鬼妹飲藍妹」的音樂節，他笑指自己年年都飲醉，去年竟然無醉，反而看清楚整個活動：「早年Clockenflap嘅對象係樂迷，真係入場享受音樂，但近年搞大咗成為城中熱話，變得潮流化商品化，明顯多咗人趁熱鬧入場，我睇Damien Rice當晚，就見到個中年大媽撳咗好耐好耐電話，我一望，原來佢喺WeChat出post——『無與倫比的表演』。」
有感Clockenflap無往年咁好玩，徐生就本着for fun的心態搞Alonekenfap：「近年音樂節愈來愈流行，但唔少音樂節依附於商業活動，淪為一次性的消費。其實音樂節可以更多元化，例如台灣的搖滾辦桌就大排筵席，可以一邊食嘢一邊聽歌。」孔生補充，如果活動性質吸引過演出陣容，觀眾不會看完心儀樂隊就走，留下欣賞更多不同樂隊的演出，有利衍生出更健康的生態。
破毒立新 重新定義
有決心搞一個另類的音樂節當然是好事，但為何高舉「毒L」的旗幟呢？
「睇完New Order後我喺度諗，聽唔同音樂嘅人都有佢哋嘅音樂節，阿爸阿媽嘅音樂節可能係《Sunday靚聲王》，咁『毒L』嘅音樂節會係點呢？」
徐生表示，Alonekenfap不是為了代表所有毒L發聲，但想用一個較有趣的方式重新展示次文化，打破固有的負面印象：「在香港，沉迷非主流或次文化的，如動漫或色情文化就被視為『毒』。這些由細到大的嗜好突然被標籤被貶低被鄙視，是相當扭曲的文化弱勢，Alonekenfap就換個方式展示這些為人唾棄的次文化，不再遮遮掩掩，令大家免卻避而不談的尷尬，可以更容易接受。」
社會實驗音樂會
Alonekenfap由最初純粹自娛，機緣巧合被大眾瘋傳到真的成事，老土講句真係「估佢唔到」，但他們依然保持玩樂至上的態度，更視之為一個社會實驗。
「周末係火炭開放日，我哋想測試一下，到底去火炭開放日嘅藝術愛好者同文青，會唔會對『毒L文化』有興趣呢？而江湖傳聞『真毒唔出街』，咁到時上到嚟嘅『毒L』，又係咩人呢？」
如此實驗性的音樂節，他們視為一場對文化生態的考察，但即使到最後來的只有圍威喂的朋友，一樣無傷大雅，畢竟最緊要是好玩嘛。
毒樂樂不如眾樂樂
講完一大輪，相信大家依然對整個活動一頭霧水，其實活動節目相當精彩，除了有大台供人打機和獨立電影分享，稱得上是音樂節，當然有多元化的音樂表演，包括電子音樂、ACG音樂和Unplugged等，在Clockenflap要大排長龍的Silent Disco，也遭惡搞成「晒撚Disco」 —— 一個「播王家衛聽動漫金曲」的舞池，他們更會把「私人珍藏」公諸同好，如VHS錄影帶，H漫和寫真集等。只要自認毒L就可免費入場，給自己一個新鮮體驗，何不在今個周末大大方方讓自己毒一次？
時間：1月30－31日（六至日）
活動開始：2pm
真人音樂表演：7pm
地點：火炭華X工廈（當日會有指示）