【每逢大事講故事】由小毒毒變方丈 走過男人最痛的埃爾多安
今時今日從政，最棹忌嘅係咩？唔係女人（你睇克林頓），唔係亂嗡當秘笈（你睇特朗普），唔係唔梳頭（你睇Boris Johnson），而係兩個字，離地！
對政客而言，出身基層重要過出身名校。出嚟行，無住過板間房、無喺碌架床做過功課、無陪阿媽揹過膠花，邊有人畀面！喺土耳其，就同樣有一名窮小子攀上權力高峰，佢就係而家嘅土國總統埃爾多安。
埃爾多安童年喺伊斯坦布爾既貧民區大，對住著名嘅金角灣，望住山上面嘅有錢精英階層夜夜笙歌，真係咪話唔羨慕。人窮，自然要諗計，埃爾多安細細個就有打吓工賺吓外快。同波叔唔同，埃爾多安就無話一毫子帶白粉，最多都只係賣吓檸檬汁同芝麻包。
呢個少年骨格精奇，窮都窮得與別不同。作為浪漫又夢幻嘅雙魚座，埃爾多安後生果時都曾經係個文藝少年。佢最鍾意吟下詩，成日自己一個去碼頭，企喺空蕩蕩嘅船上面，望住廣闊嘅大海……演講。喺我哋嘅眼中，雖然佢只係一個對海自high嘅毒L，但喺佢自己眼中，就仿若有億萬聽眾嘅大演說家，每一個浪花都係少女傾慕嘅目光……呢啲咁違世脫俗嘅嘢，你哋呢啲凡人識條鐵咩，楊過嘅黯然銷魂掌都係咁練成咋嘛！
所以飛雲成日都話，每一個毒L（包括在下）都係潛力股呀。古語有云，莫欺少年毒。就如同大部分有為青年一樣，窮小子大個咗讀嘅係商科，督信伊斯蘭教徒，仲要係足球員，真係文武全才。加上當年對海自學而成嘅一身好武功，成功贏得土耳其人嘅支持。
畢業之後，埃爾多安毅然從政。可能撇鬚留得靚，民望真係會高啲，埃爾多安自踏足選舉，一直係長勝將軍。1994年佢就做到伊斯坦布爾市長，當年佢先得40歲。果然係叻仔，做市長果時佢都解決咗唔少民生問題，儲咗唔少聲望，所以到2001年，埃爾多安成立正義與發展黨（AKP），仲要一年之後喺選舉贏到開巷，拎到三分二國會議席，成為最大黨，03年仲做埋總理。
所謂男人四十一枝花，五十都仲係風華正茂……點知竟然遇上男人一生之中最痛嘅意外！2003年埃爾多安出席典禮，幾十歲人仲要騎吓馬show off，點知意外墮馬，都不特止，隻馬仲要一腳踩咗落佢兩腿之間。
【慎入！以下是男人看了會流淚，女人看了會沉默，震驚13億人的片段重播……】
畀着一般人，可能從此一蹶不振，但佢係埃爾多安！佢唔單止自己企翻起身，仲要繼續典禮發表埋演說：「有呢啲經驗，生命先寶貴。首先，我哋係天台跌落街就學識面對現實，今日我哋墮馬就學識從另一個角度看人生。你知唔知最重要係咩？就係跌倒咗識企返起身！無論係天台定馬背跌落嚟都一樣。」吓？飛雲連擔櫈仔跌落嚟都要報工傷架喎，又墮樓又墮馬，究竟埃爾多安果幾年對住個海，係練演講定葵花寶典？
但Any肥，一個練成神功嘅人真係唔同啲，What doesn’t kill you makes you stronger果然係真理。埃爾多安連任又連任，做左三屆總理。正所謂，政治一日都嫌多，好明顯係飛雲呢啲loser嘅說話，一個咁強頑嘅政客，當然一再創高峰，2014年做埋總統，成為土耳其史上第一個選完總理又選到總統嘅領袖。
4月16日土耳其舉行修憲公投，通過後勢令總統權力大增，按此看更多： 【土耳其修憲專頁】
好多豬豬都迷信，出身基層就會關心基層知慳識儉，但sorry囉，自己錢就話姐，使緊你哋市民大眾錢咋嘛，當然多多益善、少少唔拘啦。呢位土國總統真係名符其實嘅「土皇帝」，上任就起咗個新宮殿，斥資3.5億美元，買到嘅午餐肉隨時多到可以起多層樓呀。
個宮殿就巴閉囉，有成千間房不特止，佔地有成200萬平方呎，即係幾大？即係3個凡爾賽宮左右咁大啦，即係食食吓飯去個廁所都要睇地圖開GPS咁上下啦。埃爾多安仲要有自己嘅私人實驗室同團隊，唔係搞咩生化武器，而係同朕check吓啲Kebab有無落毒。主責驗毒啲醫生仲話：「So far都無咩大鑊嘢，但係啲蔬果農藥多咗啲，我哋會好好處理。」Oh my god！點可以畀我哋尊貴嘅總統先生食農藥架！簡直要起個私人水耕菜農場畀佢添呀。
所以啲人話埃爾多安係「新蘇丹」都不無道理，當年佢喺新宮殿接見巴勒斯坦自治政府主席阿巴斯，咁貴賓來訪梗係要夾道歡迎啦，出奇嘅係夾道歡迎嘅唔係搖紅旗嘅大媽，而係着晒土耳其傳統盔甲嘅戰士！唔好以為埃爾多安鍾意玩Cosplay，呢16位戰士代表住橫跨2000年突厥人驍勇善戰的歷史。好眼力嘅你，可以睇到公元前200年的匈人帝國，到1920年奧斯曼帝國的士兵服飾演變。
之但係，啲士兵真係同佢兩個好唔夾，第一眼仲以為阿巴斯同埃爾多安係Key上去咁。不過阿巴斯真係好冷靜，畀着飛雲實以為走錯戲棚，無咩事我出返去先。
一個經歷咗咁多次民主洗禮、由選民一人一票揀出嚟嘅總統，除左洗腳唔抹腳之外，究竟份人係點呢？一言以蔽之，就係方丈。即係咩？當然係指總統大人有如少林寺般強人輩出嘅地方入面嘅精神領袖啦，絕對唔係話佢小器！話說舊年有個德國人寫咗首詩笑埃爾多安，呀總統嬲到要越洋入稟告到佢甩褲。嗱呢啲咪做實事囉！唔通仲出律師信咁龜縮？
而家飛雲好希望總統大人唔識睇中文，因為話說埃爾多安做咗總統18個月果時，司法部做咗個統計，總共有近2000單案係因為侮辱總統大人而被告，即係平均每日有3單左右，被控嘅有記者、漫畫家、學者等等，甚至連細路仔都唔放過：有個12歲同13歲嘅少年，因為撕走埃爾多安嘅海報而被告，陰功豬嘅係，佢地只係想當廢紙咁賣咗佢，賺啲零用，上面印嘅係汪明荃定彭于晏對佢哋而言都無分別。又曾經有個男人網上貼左埃爾多安同魔戒角色咕嚕嘅相，將佢地兩者拍埋一齊比較，就咁被判囚1年。
民主制度都可以選出獨裁者，埃爾多安曾經講過：「民主都好似搭火車——你上車，搭到目的地，就落車。」而家埃爾多安都到咗權力高峰喇，都差唔多時候要落車。周日（16日）土耳其就已經舉行咗修憲公投，埃爾多安如願以償，唔單止加長連任期限，仲將土耳其由議會制變做總統制，刪咗總理個位，無人同佢分薄權力，而且仲要將本來分開嘅三權重新三為一體。任命咩法官呀、部長呀都有埃爾多安份話事，未來沒有明確機制可以制衡總統權力，土耳其嘅民主就會再進一步倒退。
對於埃爾多安，相信佢都好想講一句：
等飛雲講個故事你聽，2015年土耳其國會選舉，埃爾多安嘅AKP黨滑鐵盧，失去最大黨之位。你以為民主就係願賭服輸，有啲人仲打鑼打鼓話係民主嘅勝利，實在係too simple sometimes naive！總統大人一嬲豬，話唔得喎組唔到聯合政府，補選！正所謂神說要補選，就有了補選，果然AKP再贏返，繼續做最大黨，仲要補返句：「你哋見過個遊戲係幾黑暗啦，而家你哋終於扭轉到個局面喇。」吓，邊度扭轉咗，睇過？
延伸閱讀：電影《領袖》塑造埃爾多安強人形象 總統「造神工程」湊效？
延伸閱讀：【01專訪】伙伴變敵人 護照變廢紙 滯港土耳其人進退兩難
贏咗就歡呼，輸咗就「唔得！三盤兩勝！」仿彿係同緊姨甥仔猜皇帝。況且而家反對埃爾多安嘅人，入獄嘅入獄，流亡嘅流亡，仲邊度有人係公投入面say no丫。今次埃爾多安成功透過公投修憲，學谷阿莫話齋，一統天下指日可待啊，科科。