【每逢大事講故事】頭搖又尾擺 賽車手菲永開turbo勢要鍊贏勒龐
最近國際政治圈真係非常熱鬧，過咗大半個月，大家都似乎已經接受咗特朗普會領導美國起碼4年呢個現實。下一個會再次吸引世人目光的，就會係出年舉行嘅法國大選。上星期法國共和黨完成第一輪初選投票，呀史泰龍⋯⋯唔係，前總統薩爾科齊就冧莊失敗，法國八卦雜誌又少咗個狙擊對象。咁除咗可以預見冇得睇佢太座、前名模布魯妮外，仲有咩影響呢？
「共和黨？全部都係共和黨？」
今次要講嘅又係共和黨，不過此共不同彼共，同特朗普係一啲關係都冇嘅。前稱人民運動聯盟嘅共和黨係法國右派中嘅最大黨，同左派嘅社會黨可謂二分天下，左社會右共和，講出嚟都好有霸氣。
法國選總統方法都相對簡單，首輪有人贏到一半以上票數就直接開盤，但你估咁易咩，兩輪投票制以來都從來沒有，從來都沒有～
初選就係人都可以投嘅，擺低兩歐，簽個字話自己認同共和黨理念就得。呢種制度無可避免會令非共和黨人，甚至左派選民都出動，試圖左右選舉結果，但同時相當鼓勵選民投票，所以今次投票人數相當多。
黨內初選啫，Final先叫我啦
此言差矣呀師兄。共和黨今次初選勝出者非常重要，𠵱家執政黨左派社會黨多得奧朗德唔少，加上右翼抬頭（你睇下特朗普笑得幾得戚？），右派共和黨勝算大增。
現任總統奧朗德民調支持率慘不忍睹，梁特任內咁多功績，呢兩個月支持率都係三十幾百分點左右浮沉，奧朗德上個月民調支持度得14%，係梁振英一半呀陰功⋯⋯社會黨秘書長康巴戴利斯（Jean-Christophe Cambadélis）都表明，呢個階段社會黨無論派出邊個嚟選都好，都唔夠右派砌。黨內都有聲音，希望奧朗德問霞姨攞個飯盒抖吓算啦，唔好出嚟陀衰家啦。
奧朗德民望大跌一大原因固然係處理巴黎恐襲手法，法國短時間內又再出現尼斯恐襲，法國人相當質疑奧朗德處理國防危機能力。但一直根深蒂固嘅原因係經濟問題，社會黨成功爭取人人冇工開，失業率長期維持雙位數，選民唔反彈就假啦。仲要加埋要愈行愈右，企圖爭取埋中間派支持，搞到兩面不是人。
媽呀，好亂，邊個打邊個？
共和黨初選有3個名要記住，分別係菲永（François Fillon），薩爾科齊（Nicolas Sarkozy），朱佩（Alain Juppé）。
菲永同朱佩都做過法國總理，朱佩較偏溫和中間派，相比之下菲永就再右傾一啲。薩爾科齊就係共和黨主席兼上上屆總統。菲永成日都被認為係薩爾科齊副手，但今次大比數拋離佢前老細，原因有幾。菲永拉票已經高超到可以叫做刮票，一啲無人問津嘅小城小市，佢通通唔放過。加上堅定嘅右派立場，尤其係重視經濟改革方面，令佢成功挑機。最後薩爾科齊亦選擇支持菲永。
講吓今次最有可能出線嘅菲永，呢位62歲嘅叔叔家庭觀念極重，同威爾斯籍太太Penelope結婚後，生咗5個仔女。價值觀因此相對傳統，反對同性婚姻以及讓同性伴侶擁有領養兒童嘅權利，所以吸引一班反對同性婚姻嘅選民支持。
菲永由細到大都係住係勒芒（Le Mans），呢座城市係以一個歷史悠久嘅汽車耐力賽－勒芒24小時耐力賽－而聞名，而菲永更加係熱愛呢項運動。據講佢一歲時爺爺已經帶佢睇賽車，大個後年年都會參賽，頭搖又尾擺咁飄移一番，手車都算幾辣吓。
菲永喺戰前一星期仲係望住對手薩爾科齊同朱佩個後欄，民調支持度一直浮浮沉沉。但好可惜，而家世界各地嘅民調變曬燈神，捧邊個輸邊個，燒山都可以收山呀。菲永第一輪投票得票超過44%，跑贏幾個身位，朱佩就以28%排第二，說好的薩爾科齊呢？唉，說好不提民調。
右？邊度右呀，睇過？
今個星期日（27日）菲永同朱佩就會上擂台 1 on 1，贏咗果位就預計會對戰「法西施」馬林勒龐（Marine Le Pen），點解要咁叫佢？我唔直接答你，我用例子答你。
馬林勒龐係法國極右政黨國民陣線嘅大姐大，喺呢個全球右翼崛起嘅年代，佢嘅政治不正確反而令選民覺得好pure好true，係呀，擺明係反對移民、擺明係疑歐派、擺明係行民粹路線，so what？呢位法西施嘅高章之處就係佢做得唔打嘴炮。（雖然，鄰國有個打嘴炮打到個天下返嚟嘅特朗普）
馬林勒龐上屆總統大選中屈居第三，輸咗畀社會黨嘅奧朗德、共和黨嘅薩爾科齊。但馬林勒龐喺廢青，sorry，年輕人之間好受歡迎，但法國嘅選民點會因為受荷爾蒙欺騙而投票咁簡單？
佢Daddy老勒龐（Jean-Marie Le Pen）創立國民陣線後，一直都右到不得了，着住反猶聖衣，腳踏反同彩雲，嘖嘖嘖，夠曬偏激。但馬林勒龐從來唔玩種族主義，對於反猶、納粹等等議題通通敬而遠之。佢要嘅係理性嘅極右主義，甚至同自己老竇都反目，將佢逐出黨門。佢仲提出非移民利益優先，唔知佢有冇資格叫做法國本土派呢？
如果將法國大選現況擺返落美國個context，就好似民主黨選希拉里定桑德斯先砌得贏狂人特朗普呢？政治分析師Dominique Moïsi就驚歷史重演，如果共和黨選出嚟嘅候選人唔夠狼，就會比馬林勒龐一鋪清袋，法國從此瞓捩頸，越擰越右。