單車節｜男子公路組多人炒車現紅旗　參賽者：冇得剎，一嘢撞埋去

周日（22日）香港單車節早上的環粵港澳大灣區城市自行車挑戰賽男子公路組發生意外，多人炒車。

意外在尖沙咀梳士巴利道花園對出路段發生，現場目擊者指，一開始僅有一名車手「自炒」倒地，救護車駛致欲為傷者治理時，阻擋了一條行車線，賽道收窄之下出現第二次意外，有車手撞上雪糕筒後倒地，令後方車手也需急剎閃避，最終釀成較大規模的意外，約15人炒車受傷，令大會一度出示紅旗暫停賽事。

其中一支參賽車隊的經理張先生受訪時指，自己約17人的車隊中有4人受傷，「第一次主要是運動員自己發生意外；第二次是救護車閘住咗賽道，就發生意外。」

參賽者陳先生當時也幾乎撞上雪糕筒，他道：「啲雪糕筒喺度，炒第一個人都冇事，到第三個時就向左邊掃，我咁啱喺右邊走咗出去所以冇事。」他指該處「冇得剎，一嘢撞埋去」。比賽最後重新展開，採一圈定輸贏。