【精英賽】漢華反勝青中　首入決賽爭冠

學界籃球精英賽女子決賽已有協恩穩佔一席，剛剛漢華中學就以半場反底的威勢，62：42擊敗中華基督教青年會中學，首次躋入決賽！
攝影：楊宇翹

「你識唔識打籃球呀？」漢華教練翁金驊大聲一喝，可想而知該隊局勢如何。面對上屆亞軍青中，漢華要晉級的確寸步難行，首節尾段雖被「驊哥」罵醒過來，惟青中期間一段8：0攻勢卻把比數拉開20：12。「喂你個個都軟手軟腳，大個女喇好無？」翁金驊第2節繼續開炮。不過此話似乎相當奏效，漢華一眾的加緊協防，後場的搶截更屢次成功。半場造出13分、14籃板「雙雙」的大前鋒馬丹鳳更替球隊力挽狂瀾，漢華返回更衣室前追至1分差距。

「我係咪鬧多咗呀？已經無出聲喇喎！」驊哥易邊後繼續以金句帶隊，而漢華女將越鬧越上力，防線更加強密度，壓使對手進攻無力，令該節青中僅得7分。反之漢華屢次「back door」切入輕鬆上籃，並反超對手10分。「要打就唔好咁嘅樣，畀心機加油」，翁金驊尾節終於放輕聲氣鼓勵學生，皆因球隊一眾打出爭氣波，一段10：0的攻勢更一挫對手元氣，青中該節慘得3分進帳。最終漢華以62：42取得勝利，晉級明日的冠軍戰與協恩一爭高下。

全場叫聲不斷，表現非常肉緊的翁金驊教練，賽後笑容滿面，惟他強調今天球隊表現一般：「今日麻麻，畢竟小朋友專注力散，又想多了，但最終反勝亦是不錯。」明日面對班霸協恩，驊哥直言難度十足：「無部署，明天是鬥體能，爭氣勢，協恩她們個個都很強。」