【體育．生活．傑志波叔 1】裝備大總管　25載的快樂手記

「習慣……習慣就喺傑志嗰到。」

走入石門的賽馬會傑志中心，陣陣搖滾歌聲就從更衣室傳出。 以為練習前球員在消遣，趕快繞過小巷，眼前只有一名老翁蹲下，在One Republic的《Counting Star》旋律中，一邊摺球衣一邊托托眼鏡。「興趣，跟住習慣，日日都差唔多依個方程式啦」，同一工種，同一運動，一做就近25年。雜工微不足道？「無咗我，佢地邊得掂」，說起來鏘鏗有力，他就是波叔，李永波。

快譯通、花花、傑志　25年為球員付出

當初為何做工種？「有時都好偶然嘅，91年時，舊時無咩做嘢，舊時年代無咩做嘢，跟着識咗個快譯通秘書，跟住就入咗去做，就開始喇。快譯通就做咗10年，之後做咗2年花花，再之後傑志升班就做到宜家，做咗13年。」「快譯通老闆唔做啦，之後2年花花」，波叔重複兩次。

那波記在傑志的生活，究竟是怎樣？「9點半至10點就會返到黎，跟住呢，將啲衫分配俾啲球員，姐（即）係每一個位擺番曬。我知道佢地啲number幾多號擺番係個位到。咁跟住衫呀褲襪呀毛巾呀，如果天冷，就有嗰啲衛衣呀咁擺番好曬到呀。跟住出黎就睇下啲波夠唔夠氣呀，bump好曬就搞下啲水呀，搞好水就預備啲飛碟呀，雪糕桶呀俾個教練，咁呢就睇個教練分配，咁樣。」

一個興趣，跟住一個習慣，日日都差唔多依個方程式。姐（即）係我投入左依啲就好鐘意依份工作啦。

明日復明日的方程式

摺衫、派衫、足球打氣、收衫、洗衫…… 明日復明日，看看手表，原來己過了近25載。悶？不悶，因興趣成職業，工作時感到享受，抓緊快樂的習慣從來都是美好。

「一個興趣，跟住一個習慣，日日都差唔多依個方程式，除左比賽之外，練波都係差唔多嫁喇，係咁樣。唔悶喎，我覺得好有興趣，我真係好鐘意足球啲野，就成日睇下波咁樣囉。我對依啲都唔悶嘅」，縱使波記突然一頭霧水，「姐係個啲我都唔知點講」，他俏皮地踢踢地上的足球，「姐係我投入左依啲就好鐘意依份工作啦。」
 

不論外援呀、本地、中國人，同我都好融洽，姐（即）係無咩拗撬囉。我對佢哋就好好，佢哋要咩就俾咩，個個都錫。

人人愛護有加　「習慣咪傑志個啲野囉」

「波記就是傑志命脈」，球員盧均宜並非說笑，就連經常被波記直呼「You，Number 9」的巴倫古素亦指該「潮爺爺」是隊中老大，人人對他愛護有加。「好好囉，同個個都好好，不論外援呀、本地、中國人，同我都好融洽，姐（即）係無咩拗撬囉。我對佢哋就好好，佢哋咩就俾咩，個個都錫。啱傾就係華人啱傾啲，有時外援一練完波就走，華人嗰啲撞到就會傾多兩句囉。」

佐迪？「18號！」10號呢？「10號仔咪嘉緯囉。」均宜的兒子可愛嗎？「係女！我睇住均宜大，佢07年入嚟呀」，單挑完全失敗。 加點難度， 「什麼是習慣呀波記？」這個精靈老大說：「習慣呀……姐（即）係我嚟到球場都係好開心咁樣，哈哈，姐（即）係習慣就係咁做嘢嫁啦」，想一想，「習慣咪傑志嗰啲嘢囉。」

縱橫球壇多年，並親歷「藍鳥」於本港賽中13次捧盃，波記說起來一臉威風。不過，問到哪一仗最為深刻，他理直氣壯地說：「舊時嗰啲唔記得喇。」然後又急着補充：「上年對東方，就好經典嫁喇。姐（即）係呢，我哋十幾分鐘就有個球員無啦啦俾人罰出場，跟住呢個鏡頭就影到對方領隊就騎騎騎就係到笑。咁跟住呢打到尾，4：0 無啦啦吓，我都唔知我哋咁犀利。打到4：0，當時個鏡頭又影住對方領隊，塊面當堂黑曬，嗰時一打完我好激動。」美好的，總會記得。

姐係年紀都差唔多70，係咪呀？都預咗我唔做得，唔做得，或者老闆唔請我，咁我咪走去睇下波囉。

人生已走逾一半，會怕失去嗎？「無咩所謂，我都預咗嫁嘛。姐（即）係年紀都差唔多70，係咪呀？都預咗我唔做得，唔做得，或者老闆唔請我，咁我咪走去睇下波囉。姐（即）係我係預咗咁嘅心理嫁嘛，唔會突然間無左呢好似好傷感嫁嘛，我唔會諗依啲嘢。我個人就係，姐（即）係好樂觀嘅」。波記再重複，「我預都咗呀」，大概，這是從心之年的一種氣派。