《喵星人》番外篇　古天樂周圍貼街招　尋找喵喵的故事

暑期上映的合家歡電影《喵星人》，由古天樂帶領呢隻肥貓犀犀利，同大家笑住消暑。戲中古仔一家同呢隻外星肥貓相處得非常融洽，但突然有日，犀犀利喵都冇聲就不顧而去，搞到古仔一家非常擔心。
至於呢條電影以外的《喵星人》番外篇，就講到古仔帶住兩個細路，四圍走貼街招尋貓，場面本應好悲感，但見到古仔個造型就已經想笑。

電影《喵星人》講緊真係一個來自喵星的外星生物，不過呢個外星生物冇異型咁恐怖，但殺傷力就一樣勁，只不過佢會陰啲陰啲用萌功令地球人臣服，個個甘願地成為貓奴。故事講呢個比地球人具有更高文明的喵星，其實一直想派貓來侵略地球，可惜多年來派出的使者都一去冇回頭，計劃被逼擱置。直至驍勇善戰的勇士西米魯出現，計劃得以重啟。好可惜，西米魯在行程中遺失了喵星神器，導致神力盡失，鋼條身形的西米魯淪為大肥貓身犀犀利，更在誤打誤撞間獲吳守龍（古天樂飾）收養。

雖然犀犀利成6呎高，肥腫難分，又好食懶飛，但一家人都對佢愛顧有嘉，而那份愛心更感動到犀犀利，漸漸令侵略地球之心盡失。不過一個理由，令犀犀利突然離開呢片快樂地，這個不辭而別令古仔一家非常擔心，一直四出尋找牠的下落，希望犀犀利早日愛．回家。

短片拍攝當日，古仔穿回戲服，跟扮演途人的工作人員派尋貓傳單，而當中的對白更加係古仔自己爆肚，搞到在場個個都笑到標眼水。而當片尾犀犀利出現時，就重現一份歡樂氣氛，由於呢隻肥貓太得意關係，短片拍攝完，工作人員都爭住同佢Selfie，似乎仲受歡迎過古仔喎。