【賭城群英會】點解個個都要戴假髮？　吳家樂：晶哥想要另類啲

無綫熱播中的《賭城群英會》，至今為止口碑尚算不俗，尤其馬國明等人整蠱吳家樂，讓人笑到現腹肌，當笑片睇一流。但看了幾集，不難發現劇中起碼5個角色是戴假髮，包括劉兆銘、郭峰、黎彼德、余子明、吳家樂，莫非因為有不少年紀大的老戲骨，咪住，吳家樂好後生喎，全程戴假髮究竟是什麼玩法？

劉兆銘Ming sir飾演的賭魔屠城，其實是向30年前的《千王群英會》致敬，Ming sir滿頭白髮的造型，基本上就是當年的仇大千一角，所以他戴假髮不難理解，不過現時差不多一人一假髮，就令成齣劇變到怪怪地，近日更被網民議論紛紛。其中吳家樂就被網民笑戴了假髮後，比起劇中的父親李國麟還要老，吳家樂接受《香港01》訪問，他表示樂於接受網民的批評，「有人講最緊要，即係有人留意到我哋嘅造型服飾方面花咗啲心思。老實講外型年齡嘅嘢好主觀嘅，有啲人覺得我屠大寶個角色後生咗添，各人有各人意見，等於初初《城寨》馮春美，行出嚟啲人都話你咁抽離嘅，無端端城寨點會有人白袍白面咁，之後咪一樣睇得投入。」

當問到他為何會有這些戴假髮的角色，家樂表示：「其實係晶哥(王晶) 佢自己設定，想擺一啲另類啲嘅角色落嚟，好似我依家每一寸髮絲都係要勾起，唔止頭髮，連衣著都係好誇。(會否介意造型太誇張？) 傾劇本嘅時候，都唔知其他人嘅造型係點，我都冇話特別去問點解，如果佢哋覺得試完出嚟OK喎，就咁去啦。我又唔會覺得有問題，反而覺得幾好添呀，起碼俾人睇到唔係平時做主持嘅吳家樂。」

雖然幾個角色也戴上假髮，但原來劇中吳家樂等人全是當作真頭髮去拍攝，只得郭峰是會講明戴假髮，「睇落去就知，郭峰哥個假髮係用嚟襯衫嘅，所以前面個一少撮係會成日唔同顏色，好似頭飾咁，而我同Peter哥(黎彼德)都係當真頭髮，依家出嚟效果幾得意。」不過家樂強調現時的故事開始只是輕鬆一點，跟着到了中段叻哥死，成齣劇的氣氛會有一個好大的轉捩點，兩家爆發衝突之外，還會有不少人犧牲添。