羅霖曾收王青霞人像畫　好擔心李龍基勸大家畀啲空間佢

李龍基未婚妻王青霞早前被指涉嫌造假學歷，淘寶畫作，認親認戚假冒繆騫人女兒，借錢後玩失蹤，事件鬧到滿城風雨。最後因偽造文書被入境處控告，被關押大欖女懲教所看管，令未婚夫李龍基精神飽受煎熬。

曾經在社交平台曬過王青霞贈送的人像畫作合照的羅霖，今晚（27/2）現身尖沙咀出席「仁美清叙」15周年春茗晚宴，就事件接受《香港01》訪問時表示：「其實見到單新聞之後，我係好擔心李龍基。而我都係今朝返嚟，咁所以我就覺得唔好騷擾佢住，相信會有好多人去慰問佢，同埋佢都有好多事要同律師去處理，咁所以就畀啲空間佢。（王青霞送畀你幅人像畫作點處理？）其實我屋企有好多畫，暫時就未掛出嚟，因為我屋企通常都係掛風景畫，人像就會擺埋一邊。（之前你Po文讚王青霞畫畫好快？）係呀，但其實我冇真正睇住佢畫，佢只係畀一段視頻我，顯示畫得好快就係咁。」