香港小姐首輪面試質素未理想 高層轉移視線：碩士學歷都有十分一
撰文：郭敏玲
出版：更新：
炎炎夏日，又來到香港小姐首輪面試的時候。今年膽大參加港姐的少女比往年少了一截，只得131人。而今年質素比往年更為參差，可以話冧巴越後，質素就越......（大家明喇）。據知今年有TVB副總經理(節目及製作)杜之克先生、節目監製陳旭亮先生、梁烈唯、吳家樂、丁子朗、陳凱琳、代蓮曦丹美、劉穎鏇、陳雅思做評判，當中包含著住泳衣傾偈環節。
其實今年質素比往年真是明顯下滑，TVB副總經理會見傳媒時就只有從學歷層面留意，他表示參選的人學歷越來越高：「淨係碩士學歷都有十分一。」往年除了本地佳麗，都總會有內地參選者，但今年再有新局面，就是多了兩位100%西方臉孔的外國女生參選，似乎與「香港小姐」不太吻合喎。杜先生就話：「參選得港姐真係要有香港身分證先得。」他笑言見到兩個外國女仔時，感覺特別，「有一個都覺得有啲奇怪，但另一個9歲就已經喺香港，半個香港人嚟㗎，廣東話雖然唔係好得，但都溝通到。」如果入圍到決賽，還真的是史無前例，但都怕會招來爭議，香港小姐應該係真正香港人喎。杜之克再講：「首先唔應該因為語言同血統限制，正如我頭先所講，有個由細就係香港生活，甚至香港出世。所以咩血統唔係關鍵，重要嘅係佢係咪香港人。」
另外，今年港姐入圍之後就要利用Big Big Channel幫自己拉票，成為新一屆冠軍。杜之克先生說：「呢個以後咁多屆港姐都要咁做，所以之後會鼓勵佢哋開多啲Live，但詳細玩法未定。」想不到除了全台藝人之外，未正式成為TVB成員的未來港姐都要玩埋一份，杜之克就否認借她們谷新app：「其實一直以來，網絡都係一個大趨勢，同埋係全台嘅藝人同外界互動嘅平台，係必然嘅一部分。」