【開心速遞】楊嘉欣16歲入行激罕新鮮人　升呢做配角：係好大動力

無綫出了名是不會捧新人，每當有新血加入公司必定要做閒角做返幾年浸一浸演技先會開始俾佢升LV，當然一眾港姐港男除外喇。近期出了一個江嘉敏，雖然已經22歲，不過都被網民力讚佢後生有潛力。可能無綫見原來推出新人都會有啲回響，所以近期又有一個女新人會被力捧上位，她就是只有18歲的楊嘉欣(Cherry)。她1998年出生，兩年前參加無綫的藝員訓練班入行，同班中她已經是年紀最少的一位，2016年正式開始拍劇，當然都只係一啲閒角角色，甚至連名字都沒有。到剛剛播出的《愛·回家之開心速遞》，終於有個角色的簡介－校董個女。雖然只有兩集，不過已經被一眾網民看出她的潛質，而且高佻的她擁有一對長腳，的確十分引人注意。

其實很多人18歲時還在讀書，究竟點解Cherry可以在兩年前，即是16歲就加入訓練班呢？原來她讀完中五就已經暫停學業，咁咪即係DSE都未考？在接受《香港01》訪問時她說：「我讀國際學校唔洗考DSE架其實，因為個人比較好動，鍾意試下唔同新野。有時可以做下唔同身份角色，我覺得好有趣，所以就膽粗粗試吓報名訓練班，好好彩又中咗。」在現今的香港社會，讀書賺錢勝過一切，放棄學業去追夢會唔會過唔到屋企人嗰關呢？「屋企人都好支持我想做嘅嘢，由細到大都好放心我，但係都有叫我去學下其他語言進修下。咁我覺得既然都踏左入嚟呢個行業，都想做好佢，所以我都有去跟秋生同甄詠蓓老師學下戲，識多啲前輩，俾意見我。」她認為家人的支持十分重要，因為現在年紀還少，還是跟家人一起住，錢的方面並不是最大負擔。有這個後盾做支持，加上年紀還少，的確是有資格去做自己想要做的事。

很多人說，演技其實就是你的人生經歷，當你經歷得愈多，做出來的演出便更動人。Cherry只有18歲，是有爐火純青的演技實在有點強人所難，會唔會在拍劇的時間經常被人鬧呢？她說：「無呀，可能就係我細我新，所以都會話俾我聽我有啲咩做得唔好，教我睇機位。最記得有一次我拍《雜警奇兵》，我有一場戲未做到監製要求，佢都俾左意見我，教我點做，俾我幾次機會點樣拍得好啲。反而我都想俾人鬧下，咁我先進步到。」其實Cherry好清楚自己的定位，她只是一個新人，亦知道公司一直都俾很多機會自己，所以自己亦不急於「上位」，她表示：「其實入行一兩年真係一個好短嘅時間，以前對拍戲同而家真實分別又真係唔太大分別。因為我知道世界上無一個行業可以一步登天，每個人都喺度等緊屬於自己嘅機會。我入行嘅時間仲短，就算依家俾個皇后我做都未必carry 到, 所以要趁自己年輕好好珍惜每一個機會。機會未到就好好裝備自己，睇多啲前輩嘅戲，聽多啲人哋俾你嘅意見，打好個底，相信將來一定有人欣賞。雖然依家都係做緊小角色，但我都好開心會有人留意到我，有人鼓勵我，絕對都係一個好大嘅動力！」咁細個就咁識諗，機會的確是留給有準備的人。

最近開鏡的《特技人》，Cherry在劇中被安排做傅嘉莉的助手，急升做配角，會否覺得自己被公司力捧呢？妹說：「我覺得公司都一直有俾好多機會我嘅。咁至於力唔力捧就唔知啦。琴日去左特技人試造型，傅嘉莉係個女明星，而我就飾演佢助， 所以佢去開工，我都會系佢身邊take care佢。佢係女主角，所以我都會比平時嘅劇集出現得多，好開心有得參與呢套劇。」同江嘉敏一樣都是以後生作賣點，Cherry表示每個人都有不同的地方，所以無需要刻意同人比較。有很多演員捱了幾年也未必撈到一個黃金時段劇的配角角，今次一個突如其來的機會，相信Cherry明白到的確是得來不易，真的是好好珍惜啊！