黃榕自認「零蚊經理人」爆薛影儀騷錢5位數：幫佢叫高返個價
撰文：吳子生
出版：更新：
黃榕（Gloria）今日（19/2）現身尖沙咀出席《新春卡通展派對》。被問到現時是否擔任薛影儀經理人？黃榕接受《香港01》訪問時表示：「可以話係掛名係，啲人都係透過IG搵我而搵佢去做嘢，因為啲人搵佢，佢唔覆人哋，變咗我而家係幫佢接嘢做囉。但我想講我係冇錢賺嘅經理人，我係完全一蚊都冇分過，反而我係要陪埋佢去做嘢，我仲同佢講，我係唔會要佢啲錢，因為之前啲報道成日話我幫佢接嘢，話我呃佢錢，變咗我就同佢講，你一蚊都唔好畀我，就係咁我就做咗零蚊經理人。」
黃榕又透露現時幫阿儀接騷都有5位數：「我而家都有幫佢叫高返個價，因為佢自己開價又唔識，以前係好少錢，變咗而家幫佢開返好啲，一定會有5位數。（傳你同林寶玉鬧不和是否屬實？）其實我都係透過阿儀先識佢，而我又唔係話去到唔啱嘅，可能見到啲新聞，你話我，我又話佢，變咗都會有令到我有啲唔開心囉，但我就冇嬲佢嘅。（之前有冇溝通？）之前係有，但而家就完結咗，大家就各自各生活。不過將來有機會可以溝通再溝通。」