新城營運總監馬浚偉不准DJ播他的歌：我聽到毛管戙

新城廣播首席營運總監馬浚偉和薛家燕今日（15/2）大年初六現身黃埔出席「新城廣播甲辰年新春團拜暨節目巡禮」。馬浚偉受訪時透露自己不會參與幕前的演出，同時亦已經吩咐所有DJ不准在節目中播放他的歌曲：「點解叫佢哋唔好播我啲歌，因為我聽到係會毛管戙。佢哋播家燕姐同吉吉（周吉佩）及其他歌手咪得囉。（如果有DJ唔小心播咗你啲歌會有咩懲罰？）嗰朝我哋台長程凱欣無端端播咗《幸運就是遇到你》，跟住我就傳短訊畀佢，話我聽到毛管戙。（會唔會咁冇人工加？）咁又唔會，反而佢哋升咗職喎。」

馬仔續說：「嗱我真係做到，由我1月上任，話咗我哋冇裁員，我哋真係冇裁到，反而我仲請緊人。（係咪有職升，但冇人工加？）唔係㗎，有啲人有加㗎。因為有啲職位轉換，而有啲就加人工。（家燕姐有冇份？）家燕姐人工已經好高喎。」身邊家燕姐望住馬仔接著說：「其實佢哋自然會加俾我，唔使我出聲，係咪呀？」馬仔續說：「其實我嘅職位係睇到晒所有同事嘅人工，家燕姐嘅人工我係好羨慕，佢人工、名氣地位都係高過我。」