金剛都要離開TVB 獎門人家族仲有邊位可以留低？
「嘩，不得了喇！」聞說這句就是TVB搞笑能手金剛的口頭禪，但睇怕之後都未必再有機會聽到。事關金剛早前約滿，並且離開TVB，有傳聞指金剛將會往內地發展。當網民得悉金剛不再為TVB服務，一致對消息感到可惜，不單止話「真係好突然」，而且表示「之前《迷》仲做得好好㗎喎」，更有網民聯想到TVB內在鬥爭：「金剛係曾志偉嘅Friend，離開係為咗共同進退」，似乎另有所指，總之唔係太想金剛離開。
講起金剛，能夠在香港打響知名度，最大恩人就是曾志偉。最初他於2002年在台灣娛樂圈發展，雖然後來加入過TVBS，爭取曝光率，可是事與願違。他長期只是上綜藝節目做嘉賓，沒有發圍的機會。志偉眼見金剛耐勞，所以向他建議到異地發展。最後2007年決定向香港進發，最初都是上上綜藝節目，但因為台灣人身份關係，他就可以一口唔鹹唔淡的廣東話引觀眾發笑，並以此走搞笑路線，漸漸就有香港人認識他，仲成為曾志偉的愛將。
金剛的代表作，就是與小儀合作的《街坊食神》系列。亦因為金剛與小儀主持時互塞、打情罵俏，而擦出新火花，「有森美就會有小儀」的定律亦被打破了。兩人雖然有傳過緋聞，但能夠引起注意，絕對是金剛成功之作。除此之外，金剛身為「志偉幫」，2010年開始有機會主持《超級無敵獎門人》，以及近期的《我愛香港》等。雖然他在節目裏要做下把位，經常被曾志偉、一眾主持又窒又糟質，但觀眾都一樣受落。除了綜藝節目，金剛2016年第一次做男主角，同小儀拍《愛情食物鏈》，以及上年出街的《迷》，金剛飾演笨賊，都被網民大讚做得出色，只可惜金剛離巢，未出街的《降魔的》成為他在TVB最後一套劇。
金剛離開TVB，令網民聯想曾志偉與高層余詠珊不和的傳聞。有指志偉與TVB老闆之一的「殼王」陳國強很老友，但他不滿對方重用助理總經理余詠珊，導致綜藝節目用人傾向「余黨」，即是黃翠如、洪永城一眾前有線藝人。就算後來「殼王」出口叫到曾志偉主持節目《我愛香港》，但此勢亦難以再維持，「志偉幫」不少藝人近年已少在TVB曝光，例如：
錢嘉樂
近年已進軍電影界做武指，愈做愈有知名度，出到去大把世界。
王祖藍
已返上大陸撈到好掂，更開埋經理人公司，湊自己、老婆仲湊埋其他藝人。
林曉峰
2012年重返TVB，但除了拍住獎門人做主持之外，間中才見到他做節目司儀，劇集也比較少拍，機會不算多。
王志安（Otto＠EO2）
自從《超級無敵掌門人》收檔之後，就更加見不到他的蹤影，淡出了娛樂圈。
因此，金剛離開TVB，就引起網民猜測，有種與志偉共同進退的感覺，既然此處不留人，自然靠志偉相熟的人脈往外闖。不過此乃網民FF，另外幾個「志偉幫」江欣燕、阮兆祥及湯盈盈在TVB都有劇拍，分別是《逆緣》、《溏心風暴3》，還有《開心速遞》，所以信不信由你。