譚芷昀9歲成名注定淪為生財工具？童星爆紅不一定是父母陰謀
話說近日有位9歲小妹妹譚芷昀參加《全美一叮》，一曲Celine Dion《My Heart Will Go On》技驚四座，條片upload咗上YouTube一日，就已經有二千五百萬人click爆嚟睇。呢位妹妹就咁紅遍美國，再以音波功傳到香港，都幾厲害。之不過咁，網民嘅意見就好兩極。有人欣賞妹妹人仔細細就可以踏台板，仲要喺異鄉，打開嗓子唱歌，齋勇氣已經加晒分，對比起好多人嘅童年，可能已經縮咗；不過另一方就覺得有問題，皆因小妹妹得9歲，仲有大把日子，點解唔等佢讀完書先參加比賽？會唔會係父母想將個女當搖錢樹，就連學業都唔理吸咗金先？
《全美一叮》節目，向來都有不少幼童、小朋友參加，就好似第11季咁，冠軍Grace VanderWaal都只不過得12歲。贏咗之後，仲喺上年出埋碟做唱作歌手，更被睇好佢係下一個Taylor Swift。小朋友參加呢類型比賽都屢見不鮮，不論係《全美一叮》或者係《全英一叮》（Britain's Got Talent），甚至係香港嘅《殘酷一叮》、《超級巨聲》（呢個世界實在太多比賽喇），都總會有小朋友嘅蹤影，但點解今次譚芷昀一上台，揚名國際，就畀人大力批評呢？唔通其他人就唔使理會學業？真係百思不得其解。
有人就話，小妹妹譚芷昀就畀父母推出嚟做搖錢樹，有可能係被逼。記者就喺一年前採訪過譚芷昀簽約GME China唱片公司記者會，都有聽過Celine Dion的《To love you more》，同樣都係高音勁，震音到震撼。小妹妹回應記者問題，答案都比同齡小朋友顯得老練，正如大家喺YouTube所見咁。而過去譚芷昀參加過N咁多個歌唱比賽，小型嘅唔在講，就連《中國新聲代第二季》都參加埋。照咁睇，呢位小妹妹有晒出道的預備，答問技巧、台風、壓場表演都一早訓練有素，完全100％係個表演慾強、享受舞台嘅小朋友。再加上，如果小妹妹唔喜歡的話，其實佢可以Say No。相信有唔少人的童年都被父母逼學彈琴，後來因為唔鍾意都放棄。只不過譚芷昀有天份之餘，咁啱有個同樣醉心音樂嘅爸爸，將囡囡加以訓練，將資質再激發出嚟啫。至於作為爸爸，又點會唔知仔女要讀書？記得上年訪問譚爸爸講過讀書與唱歌會分明，會做好手上功課，先至會安排表演，做家長就係做決策角色，盡量唔會盲目接Job。
至於要個小朋友出嚟，係咪代表推佢出嚟做搖錢樹？有網民亦質疑作為歌唱老師嘅譚爸爸，有可能藉囡囡人氣火熱，借啲意sell埋自己隻新碟。姑勿論係咪買細送大，其實都有唔少類似嘅例子。好似7歲就參加《全英一叮》嘅Connie Talbot，佢成名之前，其實父母為幫補家計，就算Connie幾咁鍾意唱歌都好，都冇錢畀佢學聲樂。直到見到個女真係鍾意音樂到一個地步，先至參加歌唱比賽，結果一舉成名，依家仲年賺一百萬㖭。不過Connie甚少畀人評論係家人嘅生財工具，一般只係着眼Connie歌喉、大個咗咩樣......極其量咪恥笑下啲化妝技巧。反而大家係關心唱功，而唔係細心研究父母有咩陰謀。