樂壇浪子王傑唔慘情唔唱歌 教識你「哭泣聲絕無意義」
有「樂壇浪子」之稱的王傑早前上內地節目《金曲撈》，突然自爆遲下會宣布退出樂壇：「我這十幾年寫了十幾二十首歌，都是自己寫的。然後我會出一張唱片，是最後一張唱片，出完了，我便會離開。」結果震驚了13億人。呢番說話，就好似回應緊佢其中一首歌《我會知道幾時要退》。要做到呢一步確實唔容易，呢個消息一出，不少人腦海就係浮現王傑出道到現在多首經典嘅情歌。眾多情歌，加上王傑滄桑嘅歌聲，聽到都會掏心掏肺，總有幾分滄涼。雖然好慘，但係冇佢嘅歌聲陪伴，有時候感情帶來嘅傷痛，就好似冇人同你分擔咁。所以，為大家介紹幾首王傑慘情歌。苦情人，來度過一個無眠夜！
幾分傷心幾分痴
「哭泣聲絕無意義」，分手之後掛住前度，奈何聲嘶力竭都冇用，真係需要發洩。雖然「分離從來不易」，不過諗諗下，「若是熱烈地愛多一次，放棄原來更易。」就係咁，呢啲想法來來回回係腦海掙扎......唉，鬼叫失戀係咁咩。
誰明浪子心
呢首歌一定唔會陌生喇，實有幾個朋友唱K會點呢首，仲要扮王傑嘅哭腔去唱。其實浪子點會唔想拍拖呀？但係「聽說太理想的戀愛總不可接觸」，花盡時間在人海尋覓.....倒不如其實自己一個更開心。
是否我真的一無所有
失戀之後，其中一個階段就係質疑自己，一來就係問自己：「係咪真係分開咗？」，第二樣就係：「冇咗你，其實我真係根本咩都唔係。」總之就係好痛苦。
酒醉酒醒
相信大家都試過失戀嘅時候，會借酒消愁。不過酒入愁腸愁更愁，酒精上腦個一剎，不其然就會諗起好多往事、美好回憶。半醉人間，就在甜蜜與傷痛之間拉扯，呢首歌大概就係呢種感覺。
不浪漫罪名
有時拍拖，細水長流嘅感覺先係最安穩，但奈何大家追求嘅嘢都唔一樣，係要浪漫先至係愛嘅表現......其實我想話你知：「行動係勝過一切㗎！」你感受唔到都冇計。
忘了你忘了我
「別忘了我曾擁有你，你也曾愛過我」，但呢啲完全係空想。或者我哋係兩個世界嘅人，分開之後，你就一早將我拋諸腦後。唯一辦法就係忘記自己，先可以忘記我曾經愛過你。
傷心1999
只可以話，傷心從來都冇年份之分。要傷心，幾時都得。
又愛孤獨又愛你
失戀，其實係一個尷尬狀態。知道自己要Get Over，但偏偏情緒襲來......「但此刻為何為何特別掛念，是那哀痛污染空氣，沒法逃避」王傑嘅歌就係咁有層次。