喬寶寶自認拋寶碟高手　布偉傑呻孤單過節：以前幾個鬼佬會聚吓

農曆新年在即，香港人當然積極準備過年，不過喬寶寶與布偉傑這兩個「香港人」都唔執輸，趁寶寶返蘇格蘭過農曆前提早去參加香港許願節2024，到訪林村許願樹祈福、拍攝宣傳片。

日前喬寶寶與布偉傑為香港許願節2024拍攝宣傳片，除咗介紹活動亮點之外，兩人仲大玩「食字GAG」，場面十分搞笑。去得林村當然要拋寶牒祈福，寶寶就話自己係拋寶碟嘅高手：「其實我以前成日去林村許願樹、其他寺廟參觀嘅，我唔係迷信，而係想了解文化，就要投入落去，所以我好早已經係高手，知道點發力先拋得高。今次拍片要講好多『廣東話』Gag，難唔到我地喇，我地係香港人嚟㗎！」

而布偉傑亦大呻孤單過節：「以前我地幾個『鬼佬』過年都會約埋聚吓、見面，不過今年寶寶返咗蘇格蘭同家人團聚，得翻我自己一個，如果新年冇工開就會好悶，所以今年準備會去許願節玩下，應吓節湊吓熱鬧、攞個好『意頭』！」