【雷神奇俠3】Marvel再改中文戲名《諸神黃昏》　背後有乜原因？

電影戲名真係好重要，試想下如果《Wonder Woman》（神奇女俠）叫咗做《溫達女人》、《盜墓迷城》（Mummy）就咁叫《木乃伊》你暈唔暈呢？Marvel今年10月重頭戲《雷神3》最近就因為改名問題被網友狂投訴，搞到要改名。

話說Marvel最初公布呢套《Thor: Ragnarök》 嘅時候，香港譯名是《雷神奇俠3：諸神黃昏》，點知今年4月10日Marvel在facebook張貼全新海報時，卻將《諸神黃昏》改成《雷神奇俠3：神域末日》，此名一出即時觸動網民神經，紛紛留言要求改名，甚至威脅唔改番原名就唔睇套戲。

搞到咁大件事，全因英文戲名「Ragnarök」這個詞對網友甚至睇開Marvel漫畫嘅忠粉有莫大意義，「Ragnarök」一詞源自北歐神話中一場重大災劫，當中涉及人物包括雷神Thor（索爾）、雷神父親Odi（奧丁）和弟弟Loki（洛奇），而「Ragnarök」亦常出現於多款電子遊戲和網絡遊戲，包括粉絲眾多的「Final Fantasy系列」、「魔獸爭霸系列」、「仙境傳說」等等，有些是武器或技能的名稱，有些是飛船名稱，而中文譯名都是「諸神黃昏」。故此「Ragnarök」在網友心目中就等於「諸神黃昏」，要求Marvel改名是可以理解。

可能網民反應真的很激烈，亦可能Marvel終於發現「諸神黃昏」的重要性，昨日在facebook重新公布戲名改為原本的《雷神奇俠3：諸神黃昏》，Marvel這次順應民意當然獲得網民讚賞，可以開開心心睇戲啦！