糖兄地獄減肥兩星期瘦5磅 自嘲唔係主角級：瘦咗都唔係靚仔啦！
撰文：林通賢
出版：更新：
糖兄(潘雲峰)一向給人被消失的感覺，但他不知幾實在，最近在IG上載自己做gym片段，糖兄為了健康及十月一個活動，他接受《香港01》訪問，表示已經跟了教練操了兩星期，他說:「因為爸爸最近身體有啲事啦，咁而家都無事，但令覺得健康好緊要，同埋我10月有個活動，咁都想有個新形象俾大家囉，跟教練操咗兩星期喇，做咗4次trainning，每次1個鐘，但係不停做冇休息，教練就唔係好魔鬼，不過第一次做完，我暈咗半個鐘，因為體力消耗太勁，教練話我肌力唔係好夠，我嗰次做完要坐低，飲杯水,再食粒糖。」操到暈低，但糖兄還說不是魔鬼教練，認真風趣。
糖兄現在170磅，除了搏命操肌，亦食得小心，但不需要過份節食，他說:「開始咗兩星期其實都輕咗4、5磅，但個人就精神咗，早餐食兩塊多士，以前就飲奶茶，而家飲齋啡囉，以前食公仔麵㗎，午餐都照食茶餐廳，不過就唔好食太多汁，叉燒飯就瘦叉，夜晚就我老婆整啲蒜香意粉囉，清清地又幾飽肚嘅。我太太食嘢好健康，(網友經常話你blur咗?減肥想企返前啲?)唔關事嘅，其實不嬲都有拍下片嘅，我呢次想健康啲，自己想好睇啲。」
提到練大隻，一定想到張繼聰，連糖兄都大讚對方身型好靚，他說:「練到阿聰咁靚就梗係想啦，但我又唔駛咁大隻，瘦少少著衫好睇啲就得，講真,我瘦咗都唔會係靚仔啦,你估我真係張繼聰咩?哈哈，(瘦咗會唔會影寫真?) 我唔係阿聰、周國賢，佢哋就話影靚相啫，我影，真係無謂嘥人電同memory喇，哈哈。」其實糖兄講嘢幾好笑㗎。
+3