飛常日誌｜郭柏妍停機坪拍攝中暑休克險墮地毁容 幸好有英雄救美

郭柏妍（Rosita）今日（9/1）現身機場出席劇集《飛常日誌》宣傳活動。提到有指她在中午烈日當空在停機坪拍攝期間，懷疑中暑突然暈倒，Rosita接受《香港01》訪問時直言不諱：「可能嗰一日自己飲得少水嘅關係，再加上喺嗰度都拍咗成兩個幾鐘，突然眼前一黑，成個人好似熄咗電視機咁，冇晒知覺，就暈低咗。」

Rosita續說：「到我醒返嘅時候，我都唔知發生緊咩事，望到自己已經置身喺室內嘅地方，聽返佢哋講，話我拍緊嘅時候，突然反晒白眼，成個人向前跌，好彩當時徐榮出手救咗我，佢係即刻扶住我，我先至冇跌落地下，如果唔係我個頭落地，係有機會撞爆成塊面導致毀容，後果真不堪設想。佢哋話我暈咗成5分鐘，成班人都替我擔心，到我醒返之後，佢哋如釋重負。佢哋有畀咗啲水我飲，同埋畀咗啲糖我食，等我慢慢恢復過嚟，抖咗一段時間，之後，我見冇乜嘢就繼續開工。」