周柏豪搭飛機遇粉絲拎合照簽名點算好？　「如果我瞓覺就唔好啦」

昨晚雖然懸掛8號風球，但仍無阻一班粉絲到奧海城支持由周柏豪及蔡卓妍主演的電影《原諒他77次》首映禮。提到近日藝人黃凱芹搭飛機時向空姐表明「唔影相、唔簽名」，柏豪亦略有所聞，「其實都無乜所謂，當然如果我瞓覺就唔好啦。」他笑言每一次出埠都遇好多呢個問題，「搭飛機困着10幾個鐘，都少不免。如果我得閒同狀態唔係唔好，我都會同佢哋影相。」柏豪咁識做，唔怪得之咁多粉絲鍾意佢啦！

講返個首映禮，阿Sa所屬的公司亦全體藝人總動員到場支持，認真唔話得！包括容祖兒、阿嬌、惠英紅、衛詩雅、洪卓立及湯怡等。阿Sa笑言最記得拍攝電影前，瘋狂打電話俾朋友，「第一個電話就係打俾老闆問佢有無興趣拍，佢話有，我就即刻打俾阿嬌同Joey幫手客串。」至於揀柏豪做男主角，阿Sa指因為貪對方夠紅，「我同過好多男演員合，係未同過佢，同埋導演（邱禮濤）同編劇李敏都覺得呢個角色好啱佢。」