【開心速遞】送水輝形象搞笑入屋　許家傑一日戲變長期角色

機會是留給有準備的人，對於無綫藝人許家傑來說，可謂有切身感受，還記得在5月初，許家傑在處境劇《愛．回家之開心速遞》中登場，當時他飾演送水輝，雖然只得一集戲分，但他仍然落力準備，為谷出他的健碩身材及麒麟臂，拍攝前狂舉5加侖水樽50次，當時他接受訪問提到「做得好有機會加戲」，皇天不負有心人，送水輝一角終於在《開心速遞》變成固定角色。

送水輝一角可塑性甚高，除了大大隻外，劇中他還是出租男伴，呂慧儀更誤會對方追求她，鬧出連串笑話，本來送水輝純粹用來推動呂慧儀跟馬貫東的戀情，想不到獲網民大讚角色搞笑，甚受歡迎。許家傑接受《香港01》訪問，他表示正在拍攝《開心速遞》，但要到106集才會出場(現時播到80集)，「處境劇係冇完全嘅壞人，咁之後會寫我變返好嘅，但點解會有咁嘅發展，當然唔可以穿橋住啦。」

之前劇情說到許家傑是出租男伴，莫非當中有何苦衷，「咁又唔係喎，劇裡面講我本身好願意做出租男伴，只係有啲嘢改變咗我啫。(重新加入《開心速遞》，劇中人是否對你充滿成見？)其實只得長腳蟹(呂慧儀)、馬貫東知道我真面目，當然觀眾都知啦，劇裡面其他人就唔知嘅，都當我好細心，好識去take care人，啲女仔又好鍾意我呀，而今次我又會gel晒頭，造型唔同晒，成個富二代咁，監製話我今次要好斯文、好誠懇嘅。」

其實許家傑不止忙於拍攝《開心速遞》，在另一齣劇集《棟仁的時光》中，也會見到他的蹤影，而且戲分頗重，「依家上午拍《開心速遞》，夜晚開《棟仁》。(《棟仁》的角色？)我個角色係黑社會嚟嘅，叫做頭七，而阿Ben(袁偉豪)佢係PR公司做嘅，我哋有一個龍頭造勢大會，就搵咗佢哋幫手，依家乜嘢都講marketing㗎嘛，佢就梗係唔願意做啦，而我哋會迫佢搞囉，都幾搞笑嘅。」許家傑連孭兩劇外，稍後播出的《踩過界》亦會見到他的演出，機會一浪接一浪。