高海寧做過少先隊大隊長 內地讀小學有「職銜」：大家好怕我！
返大陸時不時會見到內地的小朋友都會帶着亮眼的「紅領巾」，好多香港人都會以為紅領巾是內地小學生的象徵，高海寧（高Ling）剛好在微博放了一張陳年舊照，她童年在南京讀書，而在她的頸上正正就帶着紅領巾，她更留言hashtag：「#小學生##我是少先隊隊員##紅領巾#」。
《香港01》記者致電問高Ling，談起往事她似乎對自己的童年非常自豪，她笑說細細個已經長得好高大：「不過我就算唔高大，啲同學仔都有啲怕我，因為我係學校電台台長、少先隊大隊長同埋鼓號隊指揮，有好多職銜喺身，搞到大家好怕我。」電台我明，鼓號隊是在升旗儀式中幫忙奏樂的團隊，但少先隊係咩聽唔明……
高Ling表示少先隊全名是「中國少年先鋒」，基本上每個小朋友到一定年紀就會加入：「人人都係隊員，但唔係個個都可以做隊長，隊長係老師揀，通常都係成績好先做到，成績唔好老師都唔會揀你啦。」全校中就只有一個大隊長，換句話講，高Ling當時在校內少先隊擁有最高的「職銜」。高Ling又補充說其實大隊長未算最厲害，內地有個名銜叫「3好學生」，入選者全部都品學兼優，高Ling就曾經做過南京市的3好學生。
不過見高Ling這個post只出現在微博，沒有放在Instagram，難道是想用少先隊的身分得到內地觀眾的好感再打入大陸市場？高Ling笑謂：「唔係啊，只係我將呢張相放喺Instagram香港冇人知係咩，但我放微博大家就會有童年回憶。」高Ling直言帶紅領巾是每個內地讀書的人一定會經歷的階段：「冇得揀㗎，係另一種文化。」
網上資料顯示，少先隊是「中國共產主義青年團受權領導的群眾性兒童組織」，全國約有1億3千萬名少先隊員，基本包含了中國內地所有在校小學生，有部分宗教信徒比較集中的地區，學童會因為宗教理由而不用加入，6歲就會宣誓入隊，14歲後自動退隊。
聽高Ling講的時候，覺得少先隊有點似香港的學校風紀，又有點似童軍之類的組職，到底他們是做什麼的呢？百度百科上寫住少先隊的活動形式主要有：「隊會、參觀、訪問、社會調查、少先隊的陣地活動」，包括有科學、體育、遊戲活動，亦有讓學童得到積極的休息的假期活動。但當中有一段是講思想政治教育活動，目的是幫助少年兒童樹立革命理想，繼承革命傳統，培養共產主義道德品質等。