法證先鋒6｜蔡潔為角色陰暗面搞到精神錯亂似坐過山車：好難演

蔡潔近月為無綫新劇《法證先鋒6倖存者的救贖》在內地開工，不時中港兩邊走，今日（4/12）她現身中環出席古董錶展活動，工作忙過不停。蔡潔表示：「今日呢個活動我都係趕返嚟，一完咗之後，我又要趕返上去開工，因為而家都拍得如火如荼。咁所以攞檔期都係好緊張。」

蔡潔續說：「就好似我同關楚耀嗰條線咁真係好難演，因為有好多心理陰暗部份。而我同關楚耀喺《法證5》嗰陣時條線，可能觀眾好受落，咁變咗今輯就延續落嚟，咁但就用好新嘅角度去講，尤其恐怖程度係會加速到，咁變咗每一日個情緒都好似過山車咁。雖然情緒上好波動，但每晚一瞓落床，就即刻可以瞓得著，因為每次收得工嘅時候，我個人係散晒。」蔡潔又指自己身為法醫，難免在劇中會有急救場口：「今次整傷比較多就係我喺條街幫人做急救嘅時候，竟然喺嗰啲位整傷，我係完全估唔到。因為我跪喺地下做心外壓，搞到兩個膝頭都瘀晒，我係收工之後先知。」