朱咪咪澳門開騷似talk show　認老但繼續唱：我退休去邊度揾錢？

朱咪咪日前喺澳門開騷「《過大海》系列之朱咪咪 ME TIME演唱會」，朱咪咪先以《飛躍舞台》演唱會揭開序幕，期間有觀眾大叫「好靚」，咪咪姐即時表示：「我好靚？我知！今晚我預備咗廣東歌同國語歌唱俾大家聽，不過之前係星加坡俾記者誤會我要退休，唱咗咁耐歌，我退休去邊度揾錢？我已經因為辛苦要捱更扺夜唔拍劇，開演會就幾好同舒服吖，當大家自己人咁傾吓計，大家有問題可以隨時問我，除咗銀行戶口外，既然咁耐冇嚟澳門，下次又唔知幾時先再同大家見面，呢首歌我諗到實啱您哋聽！」有歌迷叫上一支玫瑰花，咪咪姐笑問：「乜而家環境咁惡劣咩？送花乜唔係送一扎？送一支，咁呢支花插邊好呢？」

完騷後，咪咪姐接受訪問時表示：「我現在已不是十八歲卜卜脆，是骨頭卜卜脆，所以要減些工作，不過我每個演唱會的流程和對白，也是由我自己負責撰寫和創作的，因為站在舞台上只有我最熟悉觀眾，我知道他們想要什麼，如今晚有些環節是很隨意的，才能和觀眾有所溝通，而他們的反應便會提供給我動力。」