【任噏觀點】唐寧離婚代表童話幻滅？ 唔好盲信愛情formula
對於好多巴打，35歲凍齡唐寧宣布離婚，可能係最佳福音，女神回復單身，仲唔大叫「機會嚟啦！飛雲！」？當然，呢啲只係FF，回到最初的起點，眼見連唐寧這位有仔有女，仲成日見到佢嘅幸福家庭照既女性、名符其實就係大部分女生最夢寐以求嘅的生活，可惜最後都要離婚收場，不禁讓人王家衛上身：「我開始懷疑，在這個世界上，還有什麼東西是不會過期的？」唐寧咁Sweet都要離婚，就係因為呢個case，大家就無限想像，愛情真係冇永恆？
愛情理論世上總有一千幾百萬個，其中一條formula都有唔少女仔都buy，就話：女仔要趁人生黃金時期搵到自己嘅Mr Right，然後拍一、兩年拖再結婚，就可以同對方行一世，咁就fit晒。具體咁講，女士們25歲之前好搵到男朋友喇，拍拖唔駛特別長日子，然後27、8歲拉埋天窗，仲可以趕喺適婚年齡完成㖭！從此就過著開心快樂嘅生活喇！呢一切都好似一個完美Planning。再套用落唐寧身上，25歲同鄧偉傑相戀，然後28歲結婚，雖則係奉子成婚，但建立家庭之後，唐寧相夫教子，成為大家公認嘅好媽媽，同條formula大同小異，聽落仲幾sweet吖！但最後都難逃比《蘭花刼》大嘅劫：離婚喎......咁係咪代表呢啲驚世formula根本唔work呢？一班以結婚為依歸嘅女生，見到呢單新聞後，到底要相信啲咩，先可以繼續尋覓一個人可以同你過世？
睇返而家流行嘅愛情理論，充斥住「男友有了以上幾個特點，可以跟他一輩子」、「5個特點看看他是否真的愛你」等等.....係！冇錯！大部分女仔都係想搵返個Mr. Right啫，啱晒理論所講嘅條件，就落足重注。不過，好彩地男友啱晒咀型，係咪代表坐定粒六，注定晚年無憂呢？萬一Touchwood講句：一日Mr. Right，之後唔係呢？咁係咪又要講：「錯的時間，對的人？」去搵藉口？而唔係反省喺呢段愛情，自己付出過啲咩呢？
呢啲理論令人誤會搵到Mr. Right結埋婚就代表達陣，但婚後嘅生活點樣維持呢？似乎冇乜人在意。有一句說話，睇葉念琛電影都知道：「愛情一耐咗就變感情。」但係咪必定要咁嘅結局？其實講來講去，與其搵個Checklist測試對方係咪最好一個，不如真心相信「感情好與壞，在乎溝通與關懷」聽落好似好廢，但總好過耳濡目染，盲信符合幾個理論加幾單新聞，無限FF「世上無真愛」！始終愛情係要維繫嘅。