新劇同《棟仁》撞橋？　何廣沛：純講救護人員算係TVB第一次

何廣沛早前拍畢跟陳展鵬合作的《天命》後，即從內地回港休息，等待7月開工拍攝《跳躍生命線》，內容是圍繞救護員的生涯，以及出動時救傷扶危，爭分奪秒的情況，咪住，題材內容好像似曾相識，跟袁偉豪及唐詩詠的《棟仁的時光》竟然撞橋，劇中唐詩詠就是飾演救護員隊目，而張彥博更在兩劇中也同樣擔演救護員，情況相當尷尬。

在《跳躍生命線》擔正做男一的何廣沛，原來對於劇集跟《棟仁的時光》撞橋早有耳聞，他接受《香港01》訪問表示：「有啲人話會撈亂《棟仁的時光》，其實嗰套劇只係一部分講救護，而我哋係成套喎，所以純講救護人員嘅題材算係TVB第一次。我個角色係新考入去嘅救護員，會先去學堂train完，才正式入局工作，之後會了解更多救護嘅知識呀，同埋會碰下釘咁，即係好似《學警狙擊》咁，嗰套講警察，而呢套就講救護人員。」

何廣沛笑言初初聽到這齣劇，還以為像洪永城的《守護天使》，直至聽監製解釋，才知兩齣劇講的工作範疇完全不同，「可能好多人有Call白車經驗，但就未必知道救護員其實屬於消防嘅，而拍呢齣劇之前，都安排一班演員去救護站，實習了解吓，起碼去咗三次，都想呈現最真實嘅一面俾觀眾睇，同《親親我好媽》嘅愛情喜劇好唔同，呢齣劇會遇上好多唔同嘅case，我哋嘅角色都好專業嘅。」

雖然何廣沛未知自己的角色名，但已知劇中有何拍檔，「呢套劇比較年輕化，以我所知有阿Moon(劉佩玥)，而我有幾個兄弟，郭子豪、張彥博佢哋，全部都係救護員嚟嘅。(跟劉佩玥是否飾演一對？)同阿Moon係鬥氣冤家，但之後有冇感情發展，依家就未知，要睇咗劇本先。」何廣沛笑言會睇港台的《火速救兵》，參考部分關於救護員的情節，但他最擔心的反而是在拍攝《天命》時剃光頭，在新劇未能及時生長回來，「7月開工啦，依家頭髮仲係好短，都仲未可以gel到頭。」

雖然何廣沛說新劇跟《棟仁的時光》不同，但唐詩詠自從《不懂撒嬌的女人》後，演技備受讚賞，而她未能跟王浩信開花結果，亦令不少觀眾睇到眼濕濕，甚為婉惜，以該劇走勢人氣，很大機會開拍續集，在未有續集睇之前，觀眾更希望睇到唐詩詠在另一齣劇《棟仁的時光》演出，該劇早於5月開拍，而《跳躍生命線》則要7月才開機，加上兩劇也有講述救護員的內容，隨時要犧牲其中一齣劇，延後播映日期，就像《乘勝狙擊》和《賭城群英會》的情況，看來無綫開劇之前，還是要做足功課，無謂白費一班演員的心機及努力。