《賭城群英會》甩難提早出倉　麥明詩處女作預派膠：冇得驚

《賭城群英會》一直以來被指危危乎，本來打算安排在5月8日8點半黃金檔期出街，誰知半路殺出內地劇《三生三世十里桃花》，後來又再跳一跳，改播《射鵰英雄傳2017》。簡單來說，王晶劇竟不敵內地劇，加上之前傳聞劇集播出時間一次又一次被押後，成為「倉底貨」之嫌。《賭城群英會》多次delay，如今落實出街，劇中演員都非常關注，就好似陳法蓉昨日就已經在微博叫大家6月19日坐定睇電視。點都好，之後唔駛再睇偽高清，睇到眼痛就已經好好喇！

與此同時，《賭城群英會》是十優港姐麥明詩加入TVB後第一套劇集。之前她的電影處女作《失戀日》出街，要失聲爆喊，就有網民指她演技浮誇，有少少膠味，未知今次會點呢？麥明詩接受《香港01》訪問時，對於演技毫不保留地放上電視日日播，有可能被網民放大，甚至被指戲屎，她表示：「都冇得驚，所以都唔係好驚，因為一定會發生㗎啦。」上次在《失戀日》爆喊得如此犀利，今次也不例外，她說：「都幾有幾場㗎，喊成點都係睇每一次喊嘅原因係咩，情緒表達都會唔同，所以冇得驚。」而今次《賭》出街，將會再見緋聞男友何浩文，麥明詩說：「都好呀，好耐冇見過佢，之前合作都算愉快。（怕唔怕再傳多次緋聞？）實唔會啦，佢有女朋友。」