馬國明收封口令淆底唔敢講婚事　湯洛雯：唔想我哋嘅婚禮好似活動

馬國明昨日出席劇集宣傳造勢活動，受訪期間被追問婚期，大爆遭湯洛雯詐型，不滿他經常向外透露太多婚禮的細節，勒令他封口。今日（26/9）湯洛雯現身上環出席品牌活動，就事件接受《香港01》訪問時表示：「其實我諗住靜悄悄咁影婚紗相，唔想畀人知，但佢就一嘢就講咗出去話會出埠影，嗰吓我都好愕然。然之後我都有同佢講，唔好講得太多，始終都想保留返一啲驚喜畀自己，唔想搞到我哋嘅婚禮好似活動咁，咩都話晒畀人知。」

湯洛雯續說：「其實佢份人就係好隨和，明白佢傾傾吓偈嘅時候，就無意咁講咗出嚟，咁所以第時唯有提醒返啲佢囉，就好似佢將我同佢啲情話，就咪鬼同人講。講完之後，佢又怕麻煩喎。於是我就同佢講要攞個平衡，唔係咩都同人講。（馬明好聽你話！）哈哈，佢都聽嘅。其實我都好聽佢話，而佢私底下都有嚴格嘅一面，佢份人都好有原則，有時都好硬頸，不過我係金牛座都硬頸嘅。佢對工作方面係好硬頸嘅，例如佢開工，佢一定要比準時早到場，我試過叫佢唔使畀自己咁大壓力，準時到咪得囉，但佢唔會聽，係要咁就係咁。不過佢呢個早到嘅態度係值得我學習。」