JPEX｜多名藝人為平台拍片捲風波 梁思浩：好彩我自己個人好小心
撰文：吳子生
出版：更新：
梁思浩今日（20/9）現身將軍澳電視城古裝街，為無綫綜藝節目《通靈之王2》宣傳造勢活動。對於虛擬貨幣平台「JPEX」擬涉及詐騙一案，警方拘捕8人，當中包括兩名網紅林作同陳怡，涉款約12億港元，事件引起全城關注。
梁思浩接受《香港01》訪問時表示：「其實之前有一啲嘅虛擬貨幣平台搵過我合作幫佢哋拍嘢，但我就同經理人講，我唔係好知佢哋公司做咩，於是對方就不停咁解釋畀我聽，唔知係咪我蠢，佢點講我都唔係好明佢哋背後嘅業務係做啲乜，加上本身我連財務公司搵我拍廣告我都唔拍嘅原因，我就同佢哋講，我有自己嘅紅線，所以拒絕咗佢哋。好彩我自己個人好小心，同埋我經理人都好小心，其實只要你細心睇吓，喺國內同香港都好，好多時都會借助我哋啲藝人，去宣傳一啲未必合法嘅事。（你警惕性都好強！）就好似《通靈之王》咁，識我嘅人都知我係想件事好，多過想賺錢嘅人嚟。（本身有有投資虛擬貨幣？）我係冇。因為我唔識嘅嘢我係唔會去掂囉。就好似黃金咁，我係要實實在在摸到嗰樣嘢，我先會買。」