【蘭花劫】《波士早晨》又等十年先播？ 主角黃智賢：未排到期啫
撰文：林通賢
出版：更新：
《不懂撒嬌的女人》星期日結局，緊接播放的有十年倉底劇《蘭花劫》，看完4K製作質素，再看回10年前低清畫面，《蘭花劫》第一晚應該收視不俗。戲中女主角田蕊妮早前表示非常開心，因為加盟無綫第一套作品終於出土。其實藝員見到自己播的劇集，變了倉底再破土而出，心情開心到難以形容。不過《蘭》劇男主角黃智賢相信心情就複雜多了，事關他2015年和陳慧珊合作的《波士早晨》到現在仍然未有時間表，他接受《香港01》訪問時表示，好有信心《波士早晨》會出街，但亦想網民為他集氣。
黃智賢說：「《蘭花劫》播出我都幾驚喜，亦好開心，有啲情節真係唔記得咗，但有啲主要劇情都仲記得，（但你套《波士早晨》變咗倉底，有冇信心幾時出土？）我都希望播出嘅，亦有同公司嘅人傾過，佢哋話會播嘅，不過一直未排到期啫，我相信會播嘅，我仍然好有信心，我諗唔駛等１０年咁耐啩？我呢套劇絕對見得人，劇情幾好笑，或者大家幫下手網上講下，公司會聽到㗎，（係咪高層鬥爭冇得出呀？）唔知喎，高層就問返高層啦，哈哈，我好低層㗎，我不評論，亦不揣測。」不過時裝劇最多放半年就要出街，如果放兩年……真係好難再見天日？即使播都不會是黃金時間！希望大家唔使等十年先睇到啦！
+4