港姐冠軍莊子璇忙到走堂　擔心影響學業：冇辦法都洗濕咗個頭

港姐冠軍莊子璇（Hilary）今日（7/9）現身銅鑼灣出席港姐活動。提到新學期現已開課，在港大修讀營養學課程的Hilary表示：「一陣我完咗個活動之後我就要趕住返學，之前返學嘅時候，都見到啲同學仔，佢哋見到我就冇話好大反應，佢哋都係平常心，而且佢哋都有要求同我合照。（返學衣着打扮隨便？）係呀，有時我返學都會戴帽，因為有時個樣比較攰，可以遮一遮。（網民批評你衣着MK，會否改變打扮？）其實我都係做返自己，因為本身我對衣着就冇咁講究，我係見到咩衫就着咩衫嘅人嚟。（要履行港姐職責，會否擔心影響學業？）一定有，就好似尋日咁，我已經走咗堂，我都冇辦法，都洗濕咗個頭，唯有兩樣去兼顧，之後唯有叫朋友畀啲錄音我聽返，好似尋晚咁，聽聽下我都瞓着咗。」