吳雨霏感恩有絕世好奶奶好老爺　大讚如救星：最徬徨時家人最可靠

吳雨霏（Kary）於2015年跟初戀男友網球王子洪立熙結婚，先後誕下三名子女，Kary幾近退隱專心照顧家庭，之前就曾分享一個湊三個小朋友出街，相當厲害。Kary除了是好媽媽、好太太，亦是個懂感恩的好新抱，日前她就發文感激老爺奶奶，大讚是神隊友！

Kary特意安排四人晚餐，原來暑假本安排工人齊到溫哥華，未料到意外發生，幸得老爺奶奶幫忙：「臨走前兩個禮拜突然間攞唔到visa 🙈 最後我同老公頂硬上，就2打3去左加拿大。雖然3個小朋友都非常聽話，但頭個幾日大家都要適應時差，還有一大堆家務要處理時，真係攰到一個點…本應老爺係加拿大先同我地會合，但當知道我地需要幫助，二話不說就話同我地一齊住。佢唔單止幫手照顧大個兩個，成日同佢地玩遊戲，日日仲幫BB煮埋嘢食，等我同老公可以透下氣… 簡直係我地嘅救星！深深體會到係最徬徨的時候，家人永遠係最可靠。」網民都大讚Kary好幸福，又懂得感恩相當難得。