周秀娜Deep V晚裝驚現骨感美　發燒未癒堅持出席活動：辛苦命

周秀娜（娜姐）今日（11/8）抱恙在身出席尖沙咀限定店活動。娜姐受訪時表示：「琴晚成個人好唔舒服發燒，個頭好痛同埋喉嚨好痛，於是入院醫睇急症，經診症後，醫生話我喉嚨受到細菌感染，問我打唔打支退燒針，仲話打完個人唔會咁頭痛，但我好怕打針，到最後我都冇打到，就咁食藥就算，今朝起身嘅時候個頭同喉嚨都好痛。（會唔會早兩日出席完個潑水節濕身冷親？）唔知係咪，但嗰日真係又話得幾開心。不過我個人真係辛苦命，做嘢嘅時候天氣凍着少衫又唔見病，相反每次做完嘢之後放假去玩完又會病，咁所以我都預咗自己條命係辛苦命。」