港姐2023|鄧凱文穿高踭鞋12個鐘苦練行Catwalk :十隻腳趾麻痹
撰文:吳子生
出版:更新:
候選佳麗3號鄧凱文(Eris)今日(28/7)現身電視城出席《2023香港小姐競選》師姐分享會。Eris受訪時透露參選至今已漸漸開始習慣,面對傳媒時相對沒有那麼緊張,但仍有改進空間:「起初要面對傳媒記者嘅時候,我實在係好緊張,又唔太識講嘢,而且面對鏡頭嘅時候都會好唔習慣,笑容唔夠燦爛,但而家開始適應咗,笑容都會好咗好多,愈嚟愈會習慣呢個模式。」
對於在受訓期間,穿高踭鞋行catwalk時表現失準,遭導師陳嘉容直斥:「落選與我無關」Eris承認自己手腳不協調:「雖然我係有做開運動,但其實我跳舞又真係唔叻,咁所以我能夠做到嘅嘢就係比別人做更加多。咁所以之後我每日不斷係咁練,就算返到屋企,我都會着住對高踭鞋,到臨瞓嘅時候就會除咗,有時一日會着過12個鐘,變咗着得耐,我十隻腳趾係會麻痹,但我就覺得咁係應該,就係咁我先會有進步。」