張曦雯三點式泳衣相索到爆　仲有秘訣教你keep住魔鬼身材

張曦雯(Kelly)人靚身材正就眾所周知，不過三點式大解放就真係比較少見。近日她為了拍攝TVB旅遊節目《3日2夜》，遠赴渡假聖地毛里裘斯拍攝。去得毛里裘斯，陽光與海灘當然是重點，咁陽光與海灘加美女嘅催化劑係咩？緊係三點式喇！Kelly昨晚就在自己的Facebook上載了自己的三點式泳照，相片一出已經惹來大批網民圍觀兼讚好，果然美女三點式呢個組合真係唔講得笑！

著得三點式上身，相信都要有好大嘅自信心，Kelly接受《香港01》訪問時說：「都有信心嘅，無信心就唔會影，但都無特別做啲咩，因為我都鍾意自然啲真實啲。其實我係好鍾意陽光與海灘，我喺美國嗰陣都係咁，可能返咗香港就少咗啲呢類活動，所以當我要拍旅遊節目離開香港嘅時候，就會比較開心同埋著三點式去沙灘，唔會諗咁多嘢，我好enjoy呢種感覺。」Kelly表示在香港很難好好地享受陽光與海灘，因為人實在太多了，而且水亦不夠外國清，所以無咁舒服。

能夠有咁好嘅身材，相信都落過唔少苦工，咁Kelly又點保持呢個魔鬼身材呢？她說：「平時我有做開瑜伽，其實如果大家要keep fit或者減肥，唔好唔俾自己食鍾意嘅嘢，我覺得呢個好緊要。因為之前試過想keep fit，例如我好鍾意食薯條或者朱古力，又唔俾自己食澱粉質，我覺得會好辛苦。同埋好快就會反彈返，始終想食嘅嘢始終都要食，當一有機會食就會係咁食，所以應該係食少啲份量同埋隔開食。」估唔到佢都幾有自己嘅一套，見佢咁好身材，相信大家都可以跟佢方法試吓！