靈戲逼人｜謝雪心拍廠景驚見怪手　魯振順拍燒衣戲仲出事

無綫劇集《靈戲逼人》即將播畢，有份演出嘅謝雪心、江欣燕和魯振順大爆拍攝期間遇過的不少靈異事情，聽完都毛骨悚然。

謝雪心提到其中一幕喺搭建嘅酒樓場景內拍攝，拍攝期間導演突然叫停。「原來鏡頭右上方有隻手！但攝影師見唔到有隻手......嘩！大家睇Playback啦，片段內喺右上角天花板嘅位置，有隻手伸咗落嚟，然後縮番上去！喂，但係嗰度搭建場景，天花有頂蓋，唔可能有人喺上面......」謝雪心之後再透露，有工作人員粗魯對待跟隨她多年嘅洋娃娃，將公仔腳整斷，之後該名工作人員嘅手不能郁動。直播期間，謝雪心嘗試郁動公仔，展示其能夠開合的眼睛，但未能成功，洋娃娃仲一直瞪大眼睛。

劇中飾演紙紮用品店舖老闆嘅魯振順，同扮演女鬼嘅龔嘉欣有較多對手戲。魯振順常常燒衣紙給對方：「有一場戲拍攝我燒衣，化寶時啲煙向一個方向飄走，真係好似有人攞緊嘢走咁！我覺得好奇怪......雙手合十，口中唸唸有詞，『唔好意思，我哋嚟拍嘢咋』。導演即時叫我哋快啲拍完快啲離開。」