蔡潔出新書黃宗澤未見人　聞對方自認花心即語窒：都幾坦誠

蔡潔（Jacky）今日（22/7）現身灣仔會展舉行新書《有隻貓在芒果星》簽名會。Jacky受訪時表示：「呢本新書我暫時印咗1000本，我唔敢印太多，唔知大家鍾唔鍾意，我要睇吓個反應係點先再決定再唔再加印。（今日出新書有冇通知緋聞男友黃宗澤？）佢唔知呀，因為知佢忙緊，但我會送俾佢嘅，同埋我都會迫佢買嘅。（無理由叫佢一本咁少！）我唔知，我可以迫到佢買到幾多本，哈哈。」

被問到經常同黃宗澤屢傳緋聞會否造成困擾？Jacky笑言：「其實我哋係好閨蜜，但都明白大家點解要咁寫嘅，最緊要大家睇得開心，亦都明白咁啱我哋綜藝節目出街，加上大家又鍾意睇我哋喺節目度嘅互窒對方，最緊要大家睇得開心。（黃宗澤係咪你擇偶條件？）佢應該係全港女士揀男朋友嘅條件嚟。（佢曾自認花心男，你又鍾唔鍾意花心男呢？）哦，原來佢承認自己花心⋯⋯咁佢都幾坦誠，我都唔知。不過就最好唔好啦。」